«Munaı urlaǵandardyń múlki tárkilenedi» - baspasózge sholý
«Egemen Qazaqstan» basylymynyń jazýynsha, Memleket basshysy Nursultan Nazarbaev AQSh Prezıdenti Barak Obamamen telefon arqyly sóılesti. Áńgimelesý kezinde Qazaqstan-Amerıka qarym-qatynastarynyń jaı-kúıi men perspektıvalary, sondaı-aq aldaǵy 24-25 naýryzda Gaagada ótetin ıAdrolyq qaýipsizdik jónindegi jahandyq sammıtke daıyndyq barysy talqylandy. Eki memlekettiń basshylary halyqaralyq jáne óńirlik qaýipsizdik máseleleri jóninde pikir almasty. Ýkraınadaǵy ishki saıası jaǵdaıdyń damýyna aıryqsha nazar aýdaryldy. Qazaqstan men AQSh Prezıdentteri Ýkraınadaǵy daǵdarysty osy eldiń aýmaqtyq tutastyǵyn qamtamasyz etetin jáne barlyq múddeli taraptardy jaqyndastyrýǵa septigin tıgizetin dıplomatııalyq ádisterdi paıdalana otyryp, beıbit jolmen retteý qajettigin qýattady. Bul materıal «Ýkraınadaǵy jaǵdaıǵa nazar aýdaryldy» degen taqyryppen berildi.
***
«Aıqyn» gazetiniń jazýynsha, Munaı jáne gaz mınıstrligi munaı urlaýǵa jáne zańsyz aınalymyna qatysty adamdardyń múlkin tárkileý jóninde zańdyq normany engizý týraly memlekettik organdarǵa usynys jasady. Bul týraly Munaı jáne gaz mınıstri Uzaqbaı Qarabalın málimdedi. Ótken jyly Munaı jáne gaz mınıstrligi janynan qurylǵan vedomstvoaralyq jumys toby 2014-2015 jyldarǵa arnalǵan kóleńkeli ekonomıkaǵa qarsy jobany keshe úkimet otyrysyna usyndy. Jumys toby negizinen jer qoınaýyn, munaı jáne munaı ónimderin paıdalanýdyń naqty málimetterin jınaýǵa kóńil bóldi. Munaıdyń urlanýy negizinen eki túrli jolmen jasalady eken: ártúrli munaı qurylǵylarynan, ýaqytsha qoımalardan, ken oryndaryndaǵy ýaqytsha bekitilgen skvajınalardan, ádette olardan munaı urlaýdy munaı óndirýshi kompanııalardyń qyzmetkerleri qamtamasyz etedi. Ekinshisi - munaı qubyrlaryn tesip alý arqyly urlanady. Bul jaǵdaılardyń barlyǵyn Munaı jáne gaz mınıstrligi bilip otyr. Bul jaıyndaǵy maqala «Munaı urlaǵandardyń múlki tárkilenedi» degen taqyryppen berilgen.
Osy basylymda «Buzaqy balany temirtor túzemeıdi» atty jetkinshekter tárbıesi máselesin arqaý etken saraptamalyq maqala kópshilik nazaryna usynylyp otyr. Atap aıtqanda, Májilis depýtaty N.Ábdirov qadamyn shalys basqan balany birden kolonııaǵa súırelemeı, meılinshe qoǵam ortasyna qaldyra otyryp, tárbıeleý kerek degen pikirin ortaǵa salady. "Túrme eń sońǵy sheshim, - deıdi halyq qalaýlysy. - Oǵan deıin probatsııalyq baqylaý arqyly, ortadan, óz otbasynan tysqary jibermeı, túzelip ketýine múmkindik qaldyrǵanymyz abzal. Jasóspirimniń basym bóligi qylmysqa sanaly túrde emes, ózge túrli sebeppen barady. Ony der kezinde baıqaǵan soń sot zalyna súırelemeı, bolashaq taǵdyryn buzyp almaı týra jolyn tabýǵa kómektesýge tıispiz".
*** «Túrkistan» basylymy sońǵy sanynda Eýropa Qazaq qoǵamdary federatsııasynyń tóraǵasy, saıasattaný ǵylymdarynyń doktory Abdýlqaıym Kesiji myrzamen aradaǵy suhbatty jarııalady. «Dıasporadaǵy, onyń ishinde, Eýropadaǵy qazaqtardyń quda túsý, otaý qurýy kóbinese óz arasynda bolady. Áıtpese, 80 jyldan beri elden elge kóship júrgen qazaqtar birligi men berekesinen, ulttyq dilinen, tilinen aırylyp qalar edi. Táýelsizdik alǵannan keıingi jyldary Qazaqstannan biraz qazaq qyzy Eýropadaǵy qazaqtardyń otbasyna kelin bop tústi. Sonymen qatar eýropalyq qandastar arasynda keıde ózge ult ókilderine úılenip ne turmysqa shyǵatyn jaıttar bar. Alaıda dıaspora qazaqtary kóbinese tek qazaqtarmen nekelesip, otaý qurady», - deıdi Eýropa Qazaq qoǵamdary federatsııasynyń tóraǵasy. Suhbat «Abdýlqaıym Kesiji: Qazaqy qundylyqtar - bolashaqqa mıras» degen taqyryppen berilgen. *** Elimizden shyqqan úzdik kásibı boksshy, WBA tujyrymy boıynsha álemniń sýper-chempıony Beıbit Shúmenov «Jas qazaq» basylymyna arnaıy suhbat berdi. «Sharshy alańda shydamsyz sportshylar qalmaıdy. Onyń ústine, boks jekpe-jek óneriniń bir tarmaǵy bolǵan soń, júrektilik, tózim, qaırat bári kerek. Kásibı boksqa den qoıǵaly beri meniń jalpy boksqa degen kózqarasym túbegeıli ózgerdi. Mundaǵy jaǵdaı múlde basqa. Jattyǵý da, jekpe-jek te áýesqoı bokstan qıynyraq. Sondyqtan jeńiske jetý úshin óte kóp eńbektený kerek. Búginde men táýliktiń 10-12 saǵatyn jattyǵýǵa arnaımyn. Tańerteń aýyr salmaqty ziltemir kóteremin. Kúndiz júgirý men júzýge ýaqyt bólsem, keshke boksqa shyndap kirisemin. Kúres pen gımnastıkaǵa da kóńil bólemin. Kásibı boksta jeńiske jetý úshin sporttyń barlyq túrin meńgerý kerek», - deıdi tanymal sportshy. Suhbat «Som judyryq» degen taqyryppen jarııalandy.
*** «Ekspress K» gazetiniń búgingi sanynda «Vmesto svadby - tıýrma» atty maqala berilgen. Aqtóbede jaıaý júrginshini qaǵyp ketken kólik tizgininde otyrǵan qyzdy úsh jylǵa abaqtyǵa toǵytý úkimi shyǵaryldy. 35 jasar zardap shegýshi es jımastan aýrýhanada kóz jumǵan. Onyń artynda zaıyby men eki kishkentaı balalary qaldy. Sol kúni 22 jasar Uljan Nurjanova jigitimen jolǵa shyqqan. Qaıǵyly oqıǵamen aıaqtalǵan JKO-dan keıin jigit kinániń barlyǵyn óz moınyna alady. Alaıda bir aıdan keıin qyz kinásin moıyndap, polıtsııaǵa óz erkimen keldi. Basylymnyń jazýynsha, bıylǵy jeltoqsanda Uljan men onyń súıiktisi otbasyn qurýdy josparlaǵan eken.