Munaı tasymaldaýdyń basqa balama baǵyttary pysyqtalyp jatyr – ulttyq kompanııa
«QazMunaıGaz qazirgi ýaqytta munaıdy Kaspıı qubyr konsortsıýmy júıesinen basqa baǵyttar arqyly da eksporttaýda. Atap aıtqanda, Atyraý-Samara, sondaı-aq Qytaı baǵytyndaǵy Qazaqstan-Qytaı qubyry, Aqtaý porty (Mahachkala/Baký) baǵyttary qoljetimdi. Sonymen qatar kompanııa munaıdy tasymaldaý baǵyttaryn ártaraptandyrý boıynsha qosymsha jumystar júrgizýde. Munaı tasymaldaýdyń basqa da tıimdi balama baǵyttary qazirgi ýaqytta pysyqtalyp jatyr»- delingen kompanııanyń baspasóz qyzmeti taratqan aqparatta.
Aıta ketsek, álemdik Reuters agenttiginde Qazaqstan Ázerbaıjan aýmaǵymen ótetin munaı qubyrlary arqyly jylyna 1,5 mıllıon tonna munaı eksporttaýdy josparlap otyr degen syńaıda maqala jarııalandy.
Bul rette Energetıka mınıstri Bolat Aqsholaqov Qazaqstan Baký – Tbılısı – Jeıhan munaı qubyry arqyly 1,5 mln tonna munaı eksporttaýdy josparlap otyr degen aqparatty joqqa shyǵardy.
«Aqparattyq resýrsta aıtylyp jatqan kólemmen bizdiń eksporttyq baǵyttaǵy problemany sheshý aqylǵa syımaıdy. Nege? Óıtkeni, birinshiden, atalǵan baǵytpen 1,5 mln tonna munaıdy eksporttaý qazirgi ahýaldy aıtarlyqtaı jeńildetpeıdi. Ekinshiden, bizdiń mınıstrlikte dál mundaı kelisimge qol qoıý jospary joq», -dedi mınıstr.
Onyń ústine buǵan deıin QR Prezıdenti Qasym-Jomart Toqaev munaı tasymaldaý isin ártaraptandyrýdy mańyzdy mindet dep atap, tıisti tapsyrma bergen edi.