Munaı-servıstik kompanııalardyń qyzmetkerleri sheteldik uıymdarǵa ketýde
«Munaı-servıstik salada 1 myń kompanııa jumys isteýde jáne olardyń quramynda 170 myń adam qamtylǵan. Jer qoınaýyn paıdalaný baǵytynda munaı-servıstik qyzmetterdiń jyl saıynǵy aınalymy 7 mlrd AQSh dollaryn quraıdy. Qazaqstannyń 100 iri kompanııasynyń arasynda 14-i munaı-servısine qatysty. 2016 jyldyń qorytyndysy boıynsha atalǵan servıstik kompanııalar 280 mlrd teńgeden astam somaǵa salyq tóledi», - dedi Jumaǵulov Ortalyq kommýnıkatsııalar qyzmetinde.
Onyń sózine qaraǵanda, munaı salasynda qyzmet kórsetýge tartylǵan otandyq bıznestiń úlesi shamamen 55 paıyzdy qurap otyr, al qalǵanyn sheteldik kompanııalar júzege asyrýda. Ókinishke qaraı, keıbir segmentter boıynsha qazaqstandyq bıznestiń úlesi 20 paıyz deńgeıinde ǵana. Bul turǵyda jobalaý, geofızıkalyq qyzmetterge qatysty bolyp otyr.
Sonymen qatar N. Jumaǵulov jer qoınaýy týraly jańa Kodeks aıasynda otandyq munaı-servısin damytýǵa qolaıly jaǵdaılar eskerilgenin atap ótti. Osy oraıda naryqtyń jekelegen segmentteri boıynsha qazaqstandyq qamtý deńgeıi joǵarylaıtyn bolady.
«Qazaqstannyń merdiger kompanııalaryna búginde senim atarlyqtaı joǵarylady. Teńizshevroıldyń ekinshi zaýytyn qurý kezinde jumys kúshi shetelden tartylǵan edi, ıaǵnı fılıppındikter, úndister jáne Túrkııanyń kompanııalary kóbirek kelgen bolatyn. Al qazirgi kezde osy sheteldik ınvestorlar jergilikti kompanııalardyń kómegine júginip otyrǵanyn baıqaýdamyz», - dedi Jumaǵulov.
Osy oraıda ol shetel kompanııalary otandyq sýbmerdiger uıymdardan qyzmetkerlerin ózderine tartýǵa tyrysyp keledi. Osy arqyly eń úzdik mamandar sheteldik kompanııalarǵa aýysyp jatyr.
«Biz osyndaı saıasatqa qarsymyz, sebebi qazaqstandyq sýbmerdiger uıymdar álsirep qalýy múmkin. Sáıkesinshe, aldaǵy ýaqytta óziniń mindettemelerin oryndaı almaı qalady. Bizdiń kompanııalardyń negizgi problemasy aınalymyndaǵy qarjynyń tapshylyǵyna baılanysty bolyp otyr», - dep túıdi Jumaǵulov.