Munaı servısi kompanııalarynan 3500 adam jumystan bosatylǵan – Energetıka mınıstri

NUR-SULTAN. QazAqparat – Qazirgi ýaqytta keıbir mekeme basshylary «aldaǵy ýaqytta jumys bolmaýy saldarynan jumysshylarymyz bos qalýy múmkin» degen ýáj aıtýda. Bul týraly QR Energetıka mınıstri Nurlan Noǵaev Ortalyq kommýnıkatsııalar qyzmetinde ótken onlaın brıfıngte aıtty, dep habarlaıdy QazAqparat tilshisi.

«Memleket basshysynyń tapsyrmasyna oraı Premer-Mınıstrdiń orynbasary Eraly Toǵjanovtyń basshylyǵymen Úkimettik komıssııa munaıly óńirlerge barǵanda qaralǵan eń basty másele – munaı-gaz salasynda qyzmet atqaratyn, munaı óndiretin kompanııalarda adam sanyn qysqartpaý jóninde boldy. Jergilikti ákimdikter men mınıstrlik arasynda birlesip qabyldaǵan is-sharalar josparyna sáıkes qazirgi tańda bul másele baqylaýda. Josparǵa sáıkes jumys atqarylyp jatyr», - deıdi QR Energetıka mınıstri Nurlan Noǵaev.

Onyń aıtýynsha, qazirgi ýaqytta munaı servısi kompanııalarynan 3500 adam jumystan bosatylǵan.

«Árıne, mekeme basshylary «Aldaǵy ýaqytta jumys bolmaýy saldarynan bizdiń jumysshylar bos qalýy múmkin» degen ýáj aıtýda. Degenmen birlesip qarap, joǵaryda atalǵan munaı-gaz salasyndaǵy servıstik kompanıııalarǵa, jalpy osy máselege qatysty mekeme basshylarynyń ózindik qundy tómendetip, bıznes protsesterdi ońtaılandyryp, birigip sheshim qabyldaý kerek. Óz tarapymyzdan biz birigip jumys isteýge ázirmiz», - deıdi ol.