Munaı ónimderin ótkizý kezinde deldaldarǵa tosqaýyl qoıylady

ASTANA. QazAqparat – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

«Sybaılas jemqorlyqqa qarsy baqylaýdy kúsheıtý aıasynda memlekettik-jekeshelik áriptestik jobalaryn josparlaý jáne iske asyrý protsesiniń ashyqtyǵy men aıqyndyǵy qaǵıdatyn engizý eskerilgen. Ondaı jobalardy iske asyrý kezinde monopolııalandyrýdy boldyrmaý maqsatynda olardy Monopolııaǵa qarsy organmen mindetti túrde kelisý qarastyrylǵan», - Ulttyq ekonomıka mınıstri Álibek Qýantyrov.

Memlekettik qyzmet isteri agenttiginiń usynysy negizinde zań jobasynda:

- bos laýazymǵa tikeleı taǵaıyndaý;

- Memlekettik qyzmet isteri agenttigimen «B» korpýsynyń laýazymdaryna qoıylatyn biliktilik talaptaryn kelisý;

- memlekettik qyzmetshiler jumysynyń tıimdiligin toqsan saıyn baǵalaýdy engizý boıynsha birqatar túzetý kózdelgen.

Mınıstrdiń aıtýynsha, zań jobasynda ýákiletti ekonomıkalyq operatorlardyń qyzmetin qatańdatýǵa baǵyttalǵan qosymsha talaptar júktelgen.

Qujat aıasynda «Tabıǵı monopolııalar týraly» Zańǵa birqatar túzetý engizilgen.

«Janar-jaǵarmaı salasyn reformalaý blogy boıynsha kóterme saýda jetkizýshilerine qoıylatyn talaptardy qatańdatý jolymen munaı ónimderin ótkizý kezinde deldaldarǵa tosqaýyl qoıatyn túzetýler usynylady. Zań jobasynda taýarlyq gazdy bólek esepke alýdy júrgizý úshin iri kommertsııalyq kásipkerler jáne tsıfrlyq maınıngti júzege asyratyn tulǵalar sanaty taýarlyq gazdyń jańa tutynýshylary retinde aıqyndalady», - dedi vedomstvo basshysy.

Munymen qosa, zań jobasynda saýda qyzmeti salasyndaǵy ýákiletti organǵa:

- áleýmettik mańyzy bar azyq-túlik taýarlarynyń tizbesin ázirleý;

- jergilikti atqarýshy organdar qyzmetiniń tıimdiligin baǵalaý úshin saýda salasyndaǵy nysanaly ındıkatorlardy esepteý ádistemesin bekitý;

- halyqty saýda alańymen qamtamasyz etýdiń eń tómengi normatıvterin aıqyndaý qaǵıdalary men ádisterin bekitý boıynsha ókilettikterdi berý qarastyrylǵan.

Budan buryn habarlanǵandaı, «Samuryq-Qazyna» qorynyń qyzmetin ashyq júrgizýge arnalǵan ózgerister engizilip jatyr.

Sonymen qatar, salyq túsimderiniń keıbir túrleri óńirlerge beriledi.