Munaı ónimderin ótkizý kezinde deldaldarǵa tosqaýyl qoıý talaptary kúsheıtiledi
Bul týraly Parlament Májilisinde Memleket basshysynyń jekelegen tapsyrmalaryn iske asyrý máseleleri boıynsha zań jobasyn tanystyrý kezinde QR Ulttyq ekonomıka vıtse-mınıstri Abzal Ábdikárimov aıtty, dep habarlaıdy QazAqparat tilshisi.
«Janar-jaǵarmaı salasyn reformalaý blogyna toqtalsaq, kóterme saýda arqyly jetkizýshilerge qoıylatyn talaptardy qatańdatý jolymen, munaı ónimderin ótkizý kezinde deldaldarǵa tosqaýyl qoıýdy kózdeıtin túzetýler usynyldy», - dedi A. Ábdikárimov.
Onyń aıtýynsha, zań jobasy aıasynda baǵany memlekettik ýaqytsha retteý kezeńinde gaz týraly zańnamany suıytylǵan munaı gazyn bólý bóligindegi ózgeristerge sáıkes keltirý usynylyp otyr.
Munymen qosa, ekonomıkalyq jaǵdaıdy eskere otyryp, kedendik-tarıftik jáne tarıftik emes retteý is-sharalaryn belgileýge baǵyttalǵan normatıvtik quqyqtyq aktilerdi qabyldaý merzimderin qysqartýdy kózdeıtin túzetýler qarastyrylǵan.
«Sondaı-aq kedendik-tarıftik jáne tarıftik emes retteý sharalaryn qoldaný aıasynda Úkimet pen memlekettik organdardyń ókilettikterin keńeıtý eskerilgen», - dedi vıtse-mınıstr.
Budan buryn habarlanǵandaı, Búgin Parlament Májilisinde «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Qazaqstanda kreatıvti ındýstrııa uǵymy zańnamalyq turǵyda bekitiledi.
https://kaz.inform.kz/news/kazakstanda-kreativti-industriya-ugymy-zannamalyk-turgyda-bekitiledi_a3946882