Munaı ónimderimen sý men jerdi lastaǵan qos kásiporynǵa aıyppul salyndy
BQO ekologııa departamenti basshysynyń orynbasary Murat Ermekqalıevtiń aıtýynsha, munaı ónimderimen lastaýǵa qatystylyǵyn anyqtaý úshin Chapaev atyndaǵy zaton aýmaǵynda ornalasqan barlyǵy alty kásiporyn tekserildi. Atap aıtqanda, «Dızelprom», «SeaLain», «Oral keme jasaý jáne jóndeý kompanııasy», «Estoral», «Flot» JShS jáne «Qazaqstan sý joldary» RMK Oral fılıaly tekserýden ótkizildi. Sonyń ishinde óz óndiristik bazasynda keme jóndeýmen aınalysatyn «Oral keme jasaý jáne jóndeý kompanııasy» men onyń enshiles kásiporny «Dızelprom» JShS-nyń sýǵa shyǵatyn jeri joq ekendigi belgili boldy.
Sonymen qatar úsh kásiporyn kemeleri oryn tepken sýdaǵy hımııalyq tolyq taldaý onda munaı ónimderiniń joqtyǵyn kórsetti.
Chapaev atyndaǵy zatonda jaǵalaý alańdary bar «Estoral» JShS men «Qazaqstan sý joldary» RMK Oral fılıaly ornalasqan jerden topyraq synamalary alyndy. Sonyń nátıjesinde «Estoral» JShS-nyń topyraq qabatyn munaı ónimderimen lastaǵany anyqtaldy. Bul QR Ekologııa kodeksi 217-baby 2-tarmaǵyna qaıshy keledi. Zańdy tulǵa QR Ákimshilik quqyq buzý kodeksi 337-baby 2-bóligine sáıkes (jerdi búldirý) ákimshilik jaýapqa tartyldy.
Oǵan qosa «Qazaqstan sý joldary» RMK Oral fılıaly oryn tepken aýmaqtaǵy sýdan alynǵan bes synama qorytyndysy munaı ónimderiniń shamadan tys asyp ketkenin kórsetti. Bul Ekologııa kodeksiniń 199 jáne 267-baptaryn buzý bolyp tabylady. Tekserý qorytyndysy boıynsha bul zańdy tulǵa da QR Ákimshilik quqyqbuzýshylyq kodeksi 324-baby 1-bóligi (qorshaǵan ortany qorǵaý jónindegi sanıtarııalyq-epıdemıologııalyq jáne ekologııalyq talaptardy buzý) jáne 337-baby 2-bóligine sáıkes (jerdi búldirý) jaýapqa tartyldy.
«Eki kásiporynǵa da 63 myń teńge kóleminde aıyppul salyndy. Endi anyqtalǵan kemshilikterdi joıý jumystary júrgiziledi», - dedi QazAqparat tilshisine M.Ermekqalıev.