Munaı óndirýshilerdiń mindetteri zań júzinde naqtylanbaq - Senat

ASTANA. QazAqparat - Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysy bolyp ótti. Onda «Qazaqstan Respýblıkasynyń keıbir zańnamalyq aktilerine munaı ónimderiniń jekelegen túrlerin óndirý men aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasy talqylandy. Qujatqa depýtattar bastamashylyq jasaǵan.

Zań jobasymen Salyq kodeksine jáne «Munaıdyń jekelegen túrlerin óndirý men onyń aınalymyn memlekettik retteý týraly» qoldanystaǵy zańyna ózgerister engizý kózdeledi. Atap aıtqanda, talqylaý barysynda senatorlar Salyq kodeksiniń normasyn tolyqtyrýdy, sonyń ishinde iri resýrs ıeleriniń munaı ónimderin shaǵyn jáne orta bıznes sýbektileriniń janar-jaǵarmaı stansalaryna satý múmkindikteri qarastyrylyp otyr. Budan bólek, munaı ónimderin óndirýshilerdiń mindetteri naqtylanady.

Sonymen qatar, zań jobasy aıasynda Energetıka mınıstrligine iri munaı óńdeý zaýyttarynyń óndiristik qýatynyń negizgi kórsetkishterin bekitý quqyǵyn berý usynylady.

Zań jobasy palatanyń aldaǵy ýaqytta ótetin jalpy otyrysyna shyǵarylmaq.