Munaı óndirý deńgeıi týraly kelisimge qatysty alyp-satarlyqtyń saldarynan qara altyn arzandaýda

ASTANA. QazAqparat - Dúısenbi kúni munaı baǵasy arzandaıdy, sebebi ınvestorlar OPEK-ke múshe-elder jáne uıymǵa kirmeıtin elder arasynda óndiris deńgeıin toqtatý jónindegi kelisimge qol jetkizý úshin Stambýlda ótken beıresmı kezdesýlerdiń mańyzdylyǵyna shúbá keltire bastady, dep jazdy RIA Novostı.

Agenttiktiń habarlaýynsha, Máskeý ýaqytymen tańǵy 06.57-de Brent munaıynyń jeltoqsan aıyna jetkizý fıýchersteriniń baǵasy 0,85% - 51,49 dollarǵa deıin tómendedi. WTI markaly munaı fıýchersteriniń quny 0,88% - barreline 49,37 dollarǵa deıin tústi.

28 qyrkúıek kúni Aljırdegi beıresmı kezdesýde OPEK munaı óndirisin táýligine 32,5-33 mıllıon barrelge deıin shekteýdi maquldady. Alaıda, naqty lımıtter boıynsha uıymnyń árbir eline arnalǵan shart ázirge joq. Sońǵy sheshim 30 qarasha kúni Venada ótetin OPEK-tiń resmı kezdesýinde qabyldanýy tıis. Uıym birqatar munaı óndirýshi elderdiń, sonyń ishinde Reseıdiń naryǵyn turaqtandyrý jónindegi sharalarǵa qosylýdy kútedi.

9-13 qazan kúnderi Stambýlda Búkilálemdik energetıkalyq kongress ótedi. Forýmǵa qatysýshy elder jeke kezdesý jáne kelissózder barysynda munaı baǵasy jónindegi máselelerdi talqylaıdy dep kútilýde. Osyǵan baılanysty, birneshe sarapshy naryqtaǵy jaǵdaı eleýli túrde aıqyndalady dep boljaýda.