Munaı óndirisin tómendetý boıynsha OPEK kelisimi uzartylýy múmkin

ASTANA. QazAqparat - Qazaqstan Venada Munaı eksporttaýshy elder uıymy (OPEK) men kartelge enbeıtin memleketter mınıstrleriniń úshinshi kezdesýine qatysýda, dep habarlaıdy «QazAqparat» HAA tilshisi QR Energetıka mınıstrliginiń Feısbýktegi resmı paraqshasyna silteme jasap.

Málim etilgendeı, 2017 jyldyń 30 qarashasynda Avstrııa astanasy Vena qalasynda QR Energetıka vıtse-mınıstri Maǵzum Myrzaǵalıev bastaǵan Qazaqstan Respýblıkasynyń delegatsııasy OPEK pen kartelge enbeıtin memleketter mınıstrleriniń úshinshi kezdesýine qatysady.

«Atalǵan kezdesý barysynda 2016 jyldyń jeltoqsan aıy men 2017 jyldyń birinshi jartyjyldyǵynda bekitilgen munaı óndirisin tómendetý boıynsha Kelisimdi odan ári uzartý múmkindigin talqylaý josparlanǵan. Qazaqstan Kelisimge qosyla otyryp, munaı óndirisin táýligine 20 myń barrelge deıin tómendetý mindettemesin alǵan bolatyn. 2017 jyldyń mamyr aıynda ekinshi mınıstrlik kezdesýinde Kelisimniń merzimi 2018 jyldyń 31 naýryzyna deıin uzartyldy», - delingen habarlamada.