Munaı qymbattap, teńge baǵamy nyǵaıyp keledi - Ulttyq bank
Bul týraly Ulttyq bank tóraǵasynyń orynbasary Álııa Moldabekova aıtty.
«Mamyrda etalondyq Brent surypty munaıdyń baǵasy bir barrel úshin 69,32 AQSh dollaryna deıin, ıaǵnı 3,1%-ǵa ósti. Halyqty vaktsınalaýdyń jalǵasýy jáne karantın shekteýleriniń jeńildeýi AQSh ekonomıkasyn jaqsartyp, munaı baǵasy 70 dollarǵa deıin jetti. «OPEK+» uıymy munaı óndirý jónindegi qoldanystaǵy kelisim uzartylǵannan keıin qosymsha oń kórsetkishter baıqalady», - dedi Álııa Moldabekova.
Ulttyq bank ókiliniń aıtýynsha, sonyń áserinen mamyrda teńge baǵamy 428,71 teńgege deıin nemese 0,1%-ǵa nyǵaıǵan.
«Salyq aptasy men beırezıdentter ınvestıtsııalarynyń ulǵaıýy teńge úshin qosymsha oń faktorlar boldy. Eksporttaýshylar salyq kezeńinde shamamen 290 mln AQSh dollaryn bırjada konvertatsııalady. Al beırezıdentterdiń Qazaqstannyń memlekettik baǵaly qaǵazdaryna kelýi shamamen 100 mlrd teńgeni qurady. Barlyq atalǵan oń faktorlar aıasynda teńgeniń shamaly nyǵaıýy dıvıdendter tóleý úshin shetel valıýtasyna suranystyń artýyna baılanysty boldy», - deıdi Ulttyq bank ókili.
Sondaı-aq, ol valıýta naryǵyndaǵy jaǵdaı teńgerimdi bolǵandyqtan Ulttyq banktiń ınterventsııa júrgizýine qajettilik bolmaǵanyn aıtady.
«Bıýdjetke transfertter aýdarý úshin valıýta naryǵynda 553 mln AQSh dollary konvertatsııalandy. Kvazımemlekettik sektordyń satý kólemi shamamen 340 mln AQSh dollaryna jetti. Maýsymda teńge baǵamynyń nyǵaıýy jalǵasyp otyr. Aıdyń basynan bastap munaıdyń eń joǵary baǵalary aıasynda valıýta 428,71-den 426,70 aralyǵynda nemese 0,5%-ǵa nyǵaıdy», - deıdi Álııa Moldabekova.