Munaı kompanııalarynyń ilespe gazdy jer qabatyna aıdaý oryndylyǵy tekseriledi

NUR-SULTAN. QazAqparat – Munaı kompanııalarynyń ilespe gazdy jer qabatyna qaıta aıdaý oryndylyǵy tekserilip jatyr. Bul týraly búgin Senattaǵy Úkimet saǵatynda Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Boljamdy derekterge sáıkes, 2030 jylǵa qaraı shıki gaz óndirý 87,1 mlrd tekshe metrdi quraıdy. Onyń ishinde úsh iri jobanyń (Qarashyǵanaq, Qashaǵan jáne Teńiz jobalary) óndirý úlesi 83 paıyzǵa jetedi. Sonymen qatar, óndirilgen 87,1 mlrd tekshe metr gazdyń tek 42 mlrd tekshe metri ǵana taýarlyq gazǵa qaıta óńdeledi. Qalǵan gaz qaıtadan jer qabatyn aıdalady jáne óz muqtajdyqtaryna paıdalanylady. Qazirgi ýaqytta biz gazdy aıdaýdyń úlken kóleminiń oryndylyǵyn qaıta qaraý baǵytynda belsendi jumys istep jatyrmyz», - dedi Bolat Aqsholaqov.

Mınıstrdiń dereginshe, Qarashyǵanaq jobasynda óndiriletin 19 mlrd tekshe metr gazdyń jartysyna jýyǵy qaıtadan jer qabatyna aıdalady.

«Jalpy, jer qabatyna gazdy keri aıdaý qabattyq qysymdy ustap turý úshin aqtalǵan shara sanalady. Qarashyǵanaq ken ornynda gazdy paıdalaný men óńdeýdiń balama múmkindikterin zertteımiz. Al Qashaǵanda ıgerý tujyrymdamasy gazdy alý men óńdeýge negizdelgen», - dedi ol.