Munaı-gaz kompanııalary Atyraý oblysynyń jańa ekologııalyq jobasyn ınvestıtsııalaıdy

ATYRAÝ. QazAqparat –Atyraý oblysynda kógaldandyrýǵa baılanysty 10 jyldyq joba ázirlendi, dep habarlaıdy QazAqparat tilshisi.

Bul týraly oblys ákiminiń orynbasary Erjan Ábilhanovtyń tóraǵalyǵymen qorshaǵan ortaǵa zııandy lastaýshy zattar shyǵaratyn iri kásiporyn basshylarynyń qatysýymen ótken jıynda belgili boldy. Keńes Atyraý qalasyn kógaldandyrý máselesine arnaldy.

E.Ábilhanovtyń aıtýynsha, bul joba QR Prezıdenti Qasym-Jomart Toqaevtyń eldi jappaı kógaldandyrý týraly tapsyrmasyna oraı qolǵa alynǵan.

«Atyraý oblysy ákimdigi atalǵan tapsyrmany iske asyrý maqsatynda Atyraý qalasy men onyń aınalasynda aǵash otyrǵyzý boıynsha 10 jyl júzege asyrylatyn irgeli joba daıyndady. Bul, kógaldandyrýǵa arnalǵan ýchaskelerdi, jaýapty oryndaýshyny jáne aǵash otyrǵyzý kestesin aıqyndaýdy kózdeıdi», - dedi Erjan Ábilhanov.

Atalǵan jobany júzege asyrýǵa ınvestıtsııa qajet. Osyǵan oraı oblysta aýaǵa negizgi qaldyq shyǵarýshylar – munaı-gaz óndirý jáne munaı óńdeý kásiporyndaryn tartý kózdelip otyr. «Lastaýshy qalpyna keltiredi» qaǵıdasyna sáıkes TShO, NCOC, «Embimunaıgaz», Atyraý munaı óńdeý zaýyty jáne basqalary negizgi kásiporyndar retinde anyqtalǵan. Atalǵan kásiporyndarǵa kógaldandyrý jáne 3-5 jyl boıy alǵashqy kútim jasaý úshin ýchaskeler bekitilmek. Bul ýchaskeler qalaǵa nemese orman sharýashylyǵyna beriledi.

Jıynǵa qatysýshylardyń aıtýynsha, osy jyldyń qazan-qarasha aılarynda qalanyń ózinde alǵashqy aǵashtar otyrǵyzylady. Al kelesi jyldan bastap Atyraýdyń aınalasynda «jasyl beldeý» qurý bastalady. Oblystyń orman sharýashylyǵynyń oblysta ósirilgen, Atyraýdyń qatal klımatyna beıimdelgen kóshettermen qamtamasyz etýge áleýeti jetedi.

TShO, NCOC, Atyraý munaı óńdeý zaýyty, «Embimunaıgaz» jáne ózge de kompanııa ókilderi jobaǵa qatysatynyn rastady. Al bir-eki aptadan keıin memorandýmǵa qol qoıylyp, jumys bastalady.

«Bul jobany iske asyrý aımaqtaǵy ekologııalyq ahýaldy jaqsartady. Qala turǵyndary úshin jańadan demalalys jáne serýendeıtin oryndar paıda bolady. Sondaı-aq kóp uzamaı biz tek «Atyraý» emes, «Jasyl Atyraý» dep aıtatyn kúnge jetemiz dep oılaımyn», - dedi oblys ákiminiń orynbasary Erjan Ábilhanov.

Eske sala ketelik, budan buryn Atyraý qalasyn kógaldandyrýǵa 4,69 mlrd teńge jumsalatynyn habarlap edik.