Munaı-gaz alpaýyttary gazdy qoljetimdi baǵamen usynýǵa tıis - Prezıdent

ASTANA. QazAqparat – Jańa gaz kenishterin barlaý jáne ıgerý úshin ınvestıtsııa tartý asa mańyzdy. Bul týraly Prezıdent Qasym-Jomart Toqaev «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda aıtty, dep habarlaıdy QazAqparat tilshisi.

«Eldi gazben qamtamasyz etý de – ózekti másele. Taýarly gazdyń resýrstyq bazasyn keńeıtý – Úkimettiń jáne ulttyq gaz kompanııasynyń basty mindeti. Jańa gaz óńdeý zaýyttarynyń qurylysyn tezdetý jáne qoldanystaǵy zaýyttardyń qýatyn barynsha paıdalaný qajet. Elimizdegi «Teńiz», «Qashaǵan», «Qarashyǵanaq» sııaqty munaı-gaz alpaýyttary gazdy qoljetimdi baǵamen usynýǵa tıis. Sonymen qatar, jańa gaz kenishterin barlaý jáne ıgerý úshin ınvestıtsııa tartý asa mańyzdy», - dep málim etti Prezıdent.

Aıta keteıik, dál qazir Memleket basshysy Qasym-Jomart Toqaev Qazaqstan halqyna Joldaýyn jarııalap jatyr.