Munaı baǵasysynyń arqasynda 2023 jyly bıýdjet profıtsıti bolady - Ulttyq bank

NUR-SULTAN. QazAqparat – 2023 jyly bıýdjet tapshylyǵy joıylyp, 7 mlrd dollar kóleminde profıtsıt tirkelýi múmkin, dep habarlaıdy QazAqparat tilshisi.

Ulttyq bank tóraǵasynyń orynbasary Aqyljan Baımaǵambetov Úkimet otyrysynda osyndaı málimet aıtty.

«2023 jyly munaı baǵasynyń barreline 90 dollarǵa deıin birtindep tómendeý stsenarııi kezinde tólem balansynyń aǵymdaǵy shotynyń profıtsıt aımaǵyna ótýi kútiledi. Boljamdarǵa sáıkes profıtsıt 7,0 mlrd dollardy qurap, saýda balansynyń jaqsarýymen qamtamasyz etiledi.

Tólem balansynyń ádisnamasy boıynsha taýarlar eksporty 81,6 mlrd dollarǵa deıin 35% ulǵaıady. Eksport álemdegi munaı, metall, ýran men dándi daqyldar baǵasynyń joǵary bolýyna baılanysty ósedi», - dedi Ulttyq bank ókili.

Degenmen, ol bul tendentsııanyń turaqsyz ekenin aıtty.

«Taýarlar ımporty joǵary deńgeıde qalyp, 44,2 mlrd dollarǵa jetedi. Sheteldik ónimdi tutynýdyń artýy qazaqstandyq óndiristiń ishki suranysty qanaǵattandyrýǵa shamasy jetpeı jatqanyn kórsetedi. Onyń ornyn fıskaldyq shyǵystar kólemin ósirý arqyly jabylyp jatyr.

Aǵymdaǵy shot profıtsıti turaqsyz jáne daıyn taýarlar eksportynyń kólemi aıtarlyqtaı tómen bolyp otyr. Oǵan shıkizattyń, birinshi kezekte munaıdyń álemdik baǵasynyń joǵary deńgeıde bolýy da áser etedi», - dedi Aqyljan Baımaǵambetov.