Munaı baǵasynyń tómendeýi únemdeýge úıretti - Saǵyntaev

ASTANA. QazAqparat - Munaı baǵasynyń tómen bolýyna baılanysty bıýdjet shyǵystaryn qysqartý memlekettik apparatqa kóp dúnıeni úıretti. Bul pikirdi búgin elordada ótip jatqan «Kazakhstan Global Investment Roundtable» forýmynda QR Premer-Mınıstri Baqytjan Saǵyntaev bildirdi, dep habarlaıdy QazAqparat.

«Búginde bıýdjettiń 43 paıyzy shıkizattyq sektor túsimderinen qalyptasady. Eger de munan ary da dál osy baǵytty ustana bersek, onda el Prezıdenti aldymyzǵa qoıǵan maqsattarǵa jete almasymyz túsinikti. Osynaý shıkizattyq salaǵa da tehnologııalyq jańǵyrtý júrgizip, shyǵyndardy tómendetýimiz, tipti qazirgideı baǵa bolyp turǵannyń ózinde mol kiris alýymyz qajet. Munaı barreli 100 dollardan asqan kezde bizdiki biryńǵaı shyǵystar edi. Búginde baǵa 60 dollar tóńireginde. Degenmen biz 40 dollar bolǵanda da ómir súrdik. Bıýdjetten artyq shyǵystarymyzdy alyp tastadyq jáne bul bizge kóp dúnıeni úıretti», - dedi ol.

Sonymen qatar Úkimet basshysy Qazaqstan shıkizattyq basymdyǵynan bas tartpaıtyndyǵyn taǵy bir márte aıtty.

«Biz Qudaı bergen basymdyqty joǵaltqymyz kelmeıdi. Biraq, sonymen qatar básekege qabilettilik te arta túsýi qajet. Ekinshi jaǵynan álemniń damyǵan 30 eliniń qataryna qosylý úshin ekonomıka ósimin 6-7 paıyz kólemine jetkizemiz desek, onda ekonomıkamyzdyń ósim draıveri bolatyn jańa salalar da qajet. Al bul jerde ázirlemeler men jańa tehnologııalarsyz eshqaıda bara almaısyń», - dedi Premer-Mınıstr.

Baqytjan Saǵyntaevtyń aıtýynsha, eger burynyraq bıznes ǵylymı ázirlemelerge ınvestıtsııa salýǵa qulyqsyz bolsa, qazirgi ýaqytta olardyń tarabynan qyzyǵýshylyq artyp keledi.

«Búginde ǵylymı ázirlemelerge suranys artyp keledi. Eger burynyraq, oǵan eshkim qaramasa, qazirgi ýaqytta úlken qajettilik týyndap otyr. Biz muny kórip otyrmyz jáne osy baǵytta jumys isteýdemiz», - dedi ol.