Munaı baǵasynyń kóterilýinen Ulttyq qorǵa túsetin túsim 5 esege ósti

NUR-SULTAN. QazAqparat – Jyl basynan beri Ulttyq banktiń altyn-valıýta aktıvteri valıýtalyq ınterventsııalar, ekinshi deńgeıli bank shottaryndaǵy qaldyqtardyń jáne syrtqy borysh boıynsha tólemderdiń esebinen 851 mln dollarǵa tómendedi, dep habarlaıdy QazAqparat tilshisi.

Úkimet otyrysynda QR Ulttyq bankiniń tóraǵasy Ǵalymjan Pirmatov osyndaı derek keltirdi.

«Jalpy halyqaralyq rezervter sáýir sońynda 85,9 mlrd AQSh dollaryn qurady. Ulttyq Banktiń altynvalıýta aktıvteri jyl basynan beri valıýtalyq ınterventsııalar, ekinshi deńgeıli bank shottaryndaǵy qaldyqtardyń jáne syrtqy borysh boıynsha tólemderdiń esebinen 851 mln dollarǵa tómendep, 33,5 mlrd dollardy qurady. Ulttyq qordyń aktıvteri 52,4 mlrd dollardy qurady. Respýblıkalyq bıýdjetke 1,5 trln teńge transfert bólý úshin bıylǵy 4 aıda 2,3 mlrd dollarǵa valıýtalyq aktıvter satyldy. Munaı baǵasy kóterilgen tusta Ulttyq qorǵa túsetin túsim ótken jyldyń osy kezeńimen salystyrǵanda 5 eseden kóp ulǵaıyp, jyl basynan beri 2,1 trln teńgeni qurady», - dedi Ǵalymjan Pirmatov.

Sondaı-aq, ol Ulttyq qordyń kiristiligi 30 sáýirge 3,22%-ǵa jetkenin atap ótti. ıAǵnı, bul Ulttyq qor tarıhynda bolmaǵan ósim.

«Sońǵy 5 jáne 10 jyldaǵy kiristilik jyldyq kórsetkishte, tıisinshe 2,38% jáne 1,62% bolyp kelgen edi», - dedi Ulttyq bank basshysy.

Buǵan deıin Ulttyq bank teńge baǵamyn turaqtandyrý sharalaryn júrgizip jatqanyn málim etken bolatyn.