Munaı baǵasy rekordty deńgeıde quldyraǵannan keıin qaıta kóterildi

AMMAN. QazAqparat – Dúısenbi kúni munaı baǵasy 1%-dan astamǵa qymbattady, óıtkeni AQSh-ty qamtamasyz etetin negizgi qubyr áli jabyq jáne Reseı Batys elderiniń eksport baǵasyn tómendetemiz degenine jaýap retinde óndiristi qysqartatynyn aıtyp qorqytty, dep habarlaıdy QazAqparat Reuters agenttigine silteme jasap.

Dúısenbi kúni Astana ýaqyty boıynsha saǵat 10:30-ǵa deıin Brent markaly munaı fıýchersteri 41 tsentke nemese 0,5% - ǵa ósip, bir barreli 76,51 dollarǵa jetti.

West Texas Intermediate markaly amerıkalyq munaı barreline 71,55 dollar deńgeıinde saýdalandy. Bul burynǵy baǵalardan 53 tsentke nemese 0,8%-ǵa joǵary.

Dúısenbide Brent jáne WTI baǵasy ósti. Aıta keteıik, ótken aptada eki munaı markasy 2021 jyldyń jeltoqsanynan bastap eń tómengi deńgeıge túsip ketken edi.

Oǵan yqtımal jahandyq retsessııa munaıǵa suranysqa áser etedi degen qaýip sebep boldy.

«Munaı baǵasy ósip jatyr, óıtkeni Keystone munaı qubyry jabyq, Qytaı COVID-ty baqylaýdy jeńildetti jáne Reseı óndiristi qysqartýy múmkin degen qaýip bar», - dedi OANDA kompanııasynyń aǵa naryq taldaýshysy Edvard Moıa.

Qýaty táýligine 622 myń barreldi quraıtyn Keystone munaı qubyry – mańyzdy arterııa, ol kanadalyq aýyr munaıdy Alberta provıntsııasynan AQSh-tyń orta batysyndaǵy jáne Meksıka shyǵanaǵy jaǵalaýyndaǵy munaı óńdeý zaýyttaryna jetkizedi.

Sonymen qatar, álemdegi eń iri shıki munaı ımporttaýshysy Qytaı óziniń koronavırýsqa qarsy qatań saıasatyn jeńildetip jatyr.

Osyǵan qaramastan, Beıjińdegi kósheler tynysh, kóptegen kásiporyndar osy demalys kúnderi jumys istemedi, al turǵyndar qalypty jaǵdaıǵa oralýǵa áli kóp ýaqyt qajet deıdi.

Juma kúni Reseı prezıdenti V. Pýtın álemdegi eń iri energııa resýrstaryn eksporttaýshy óziniń eli óndiristi qysqartyp, G7 elderi kelisken Reseı eksportyna «oıǵa qonymsyz» baǵa shegin belgilep, kez kelgen memleketke munaı satýdan bas tartýy múmkin ekenin málimdedi.

Foto: www.reuters.com