Múmkindigi shekteýli 9 adam Semeıde qulaıyn dep turǵan úıdi panalaýǵa májbúr

<p>Semeı qalasynda erkin kúresten jattyqtyrýshy, qoǵam belsendisi Erjan Ámirhanov Prezıdent Qasym-Jomart Toqaevqa beıneúndeý joldap, qulaıyn dep turǵan eski úıdi panalaýǵa májbúr múmkindigi shekteýli jandarǵa kómek kórsetýdi surady, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Erjan Ámirhanov beıneúndeýdi Instagram jelisindegi jeke paraqshasynda jarııalady.

«Maǵan Semeıdegi apatty jaǵdaıdaǵy úıde turyp jatqan azamattar habarlasty. Osynda barlyǵy 52 adam turady Onyń ishinde múmkindigi shekteýli 9 adam bar. Bul úıde turý rasymen de qaýipti. Turǵyn úı ınspektsııasy olarǵa jańa úıdi kezekteri kelgende alatyndyqtaryn habarlaǵan. Biraq eki jarym jyldyń ishinde bul kezek múlde jyljymaǵan», – deıdi ol.

Bapker óz sózinde qaıǵyly jaǵdaı bolmaı turyp, azamattardy úımen qamtamasyz etý kerektigin jetkizdi.

«Bul úıge qaraýdyń ózi qorqynyshty. Ne aıtarymdy da bilmeımin. Munda eshqandaı jaǵdaı jasalmaǵan. Kómektesýińizdi suraımyn. Tym bolmaǵanda jaldamaly páter berilse», – deıdi Erjan Ámirhanov.

Semeı qalasy ákimdiginiń baspasóz qyzmeti Kazinform tilshisine atalǵan jaǵdaıǵa qatysty jýyq ýaqytta aqparat usynýǵa ýáde etti.

Aıta keteıik, Erjan Ámirhanov 2018 jyly 48 adamdy ajaldan qutqaryp qalǵan beıbit kúnniń batyry. Byltyr «Respýblıka qaharmandary» atty arnaıy jobamyzda sportshy týraly jazǵan bolatynbyz.