Múmkindigi shekteýli 9 adam apatty úıde turyp jatyr: Semeı ákimdiginiń jaýaby

<p>Semeı qalasynyń ákimdigi múmkindigi shekteýli 9 adam turyp jatqan apatty jaǵdaıdaǵy úıge qatysty jaýap berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Erkin kúresten jattyqtyrýshy, qoǵam belsendisi Erjan Ámirhanov Prezıdent Qasym-Jomart Toqaevqa vıdeoúndeý joldap, qulaıyn dep turǵan eski úıdi panalaýǵa májbúr múmkindigi shekteýli jandarǵa kómek kórsetýdi suraǵan bolatyn.

Osy máselege oraı Kazinform tilshisine Semeı qalasynyń ákimdiginen jaýap berdi.

«Kojkombınat kóshesindegi 19 páterli bul úı 1973 jyly salynǵan. 2021 jyldyń 24 shildesinde saraptama qorytyndysy boıynsha resmı túrde apatty jaǵdaıda dep tanyldy. Ǵımarattyń tozý kórsetkishi 70% quraıdy. Osyndaǵy 7 páterdiń ıeleri «Jalǵyz baspanasy apatty jaǵdaıda dep tanylǵan QR azamattary» sanaty boıynsha memlekettik turǵyn úı qorynan úı kezegine tirkelgen. Memlekettik turǵyn úı qorynan úı kezek tártibimen beriledi», – dep habarlady ákimdiktiń baspasóz qyzmetinen.

Ákimdik málimetinshe, «Turǵyn úı qatynastary týraly» QR Zańynyń 2-baby 14-tarmaǵyna sáıkes, kondomınıým obektisiniń bólikteri (qasbetteri, kireberisteri, foıeleri, holldary) kondomınıým obektisiniń ortaq múlki.

«Zańǵa sáıkes, turǵyn úıdiń jaı-kúıi úshin jaýapkershilik onyń ıelerine júkteledi. Tıisinshe, páter ıeleri jóndeýge qarajat jınaýǵa mindetti. Bul joǵary atalǵan Zańnyń 32-baby 7-tarmaǵynda kórsetilgen», – delingen jaýapta.