Múmkindigi shekteýli adamdardyń quqyǵy buzylǵan – mınıstrlik

NUR-SULTAN. QazAqparat – Eńbek jáne áleýmettik qorǵaý mınıstrligi óńirlerdegi múgedekterdiń quqyqtaryn buzý faktilerin anyqtady, dep habarlaıdy QazAqparat mınıstrliktiń baspasóz qyzmetine silteme jasap.

2020 jyldyń úsh toqsanynyń qorytyndysy boıynsha QR Eńbek mınıstrligi Eńbek, áleýmettik qorǵaý jáne kóshi-qon komıtetiniń óńirlik departamentteri júrgizgen tekserýler barysynda 472 obektide múgedektigi bar adamdardyń áleýmettik jáne kólik ınfraqurylymy obektilerine kirip-shyǵýyn qamtamasyz etý boıynsha buzýshylyqtar anyqtaldy.

Joǵaryda atalǵan kezeńde memlekettik basqarý, densaýlyq saqtaý, mádenıet jáne kóliktik qyzmet kórsetý salalaryndaǵy obektilerde buzýshylyqtardy anyqtaý boıynsha barlyǵy 658 baqylaý is-sharasy ótkizildi. Onyń ishinde 624 obektide múgedektigi bar adamdar úshin qoljetimdi ortany qamtamasyz etý turǵysynan tekserý júrgizildi. Bul rette profılaktıkalyq baqylaý sheńberinde 459 tekserý júrgizildi, azamattardyń ótinishteri boıynsha jospardan tys 199 tekserýge bastamashylyq etildi.

Tekserý nátıjesinde múgedektigi bar adamdardy áleýmettik qorǵaý jáne olarǵa arnaýly áleýmettik qyzmet kórsetý salasynda anyqtalǵan buzýshylyqtardy joıý týraly 472 uıǵarym berildi, olardyń 37-si boıynsha jalpy somasy 9,1 mln teńgege ákimshilik aıyppul salyndy.

Qazaqstanda barlyǵy 34 883 áleýmettik ınfraqurylym obektisi bar, onyń ishinde 34 509 obektide jergilikti atqarýshy organdar múgedektigi bar adamdar úshin qoljetimdi ortany uıymdastyrý turǵysynan pasporttaý júrgizýdi josparlap otyr. 2020 jyldyń úsh toqsanynyń qorytyndysy boıynsha rásim 34 279 obektide júrgizildi.

Aıta ketý kerek, 25 648 (75%) pasporttalǵan obekt qosymsha beıimdelýge tıis. Aǵymdaǵy jylǵy 1 qazandaǵy jaǵdaı boıynsha olardyń 24 939-y beıimdeldi.