Astanada 2 500-den astam quqyq qorǵaýshy kúndelikti kezekshilik pen monıtorıng jasaıdy

<p>Elordada vandalızmmen kúresý jáne aldyn alý boıynsha belsendi jumys júrip jatyr. Qala boıynsha 2 500-den astam quqyq qorǵaýshy kúndelikti kezekshilik pen monıtorıng jasaıdy, dep habarlaıdy <a href="https://kaz.inform.kz/" target="_blank" rel="noopener">Kazinform </a>Astana ákimdiginiń resmı saıtyna silteme jasap.&nbsp;</p>

Polıtseıler elordada jedel jaǵdaıdy turaqtandyrýǵa, qoǵamdyq oryndarda jáne elorda kóshelerinde tártipti qamtamasyz etýge baǵyttalǵan uıymdastyrýshylyq-praktıkalyq is-sharalardy júzege asyrady.

Osy jyldyń 10 aıynda usaq buzaqylyq úshin 1200-den astam adam jaýapqa tartyldy.

Mysaly, azamattardyń turǵyn úılerdiń kireberisteri men qoǵamdyq oryndarǵa dáret syndyrǵan birneshe jaǵdaı anyqtaldy. Olardyń barlyǵy ákimshilik qamaýǵa alynyp, jazalandy.

Memleket basshysynyń tapsyrmasy boıynsha bıyl 1 qańtardan bastap vandalızm aktileri, qoǵamdyq jáne jeke múlikti búldirgeni úshin jaza qatańdatyldy. Qazaqstan Prezıdenti Qazaqstan Respýblıkasynyń Ákimshilik quqyq buzýshylyq týraly kodeksine tıisti túzetýlerge qol qoıdy. Máselen, zalal 200 AEK nemese 690 myń teńge somasynan aspaıtyn bótenniń múlkin qasaqana joıǵany nemese búldirgeni úshin ákimshilik jaýapkershilik engizildi (QR ÁQBtK 147-1-baby).

Jyl basynan beri QR ÁQBtK-niń 147-1-baby boıynsha Astanada 120 quqyq buzýshylyq anyqtaldy. Mysaly, mamyr aıynda Qosshyǵululy kóshesinde belgisiz adam turǵyn úıdiń janyndaǵy shlagbaýmdy búldirgen. Er adamǵa aıyppul salyndy. Quqyq qorǵaý organdary men memlekettik organdar osy baǵytta jumys istep jatyr.

Esterińizge sala keteıik, Astanada belgili qoǵam qaıratkerleri quqyq qorǵaý organdarynyń qyzmetkerlerimen jáne eriktilermen birlesip «Toqta, vandal» aktsııasy aıasynda aýdandar boıynsha turaqty negizde túngi reıdter ótkizedi.