Múlik ıeleriniń birlestigi kommýnaldyq qaryzdy qalaı óndiredi
Ortalyq kommýnıkatsııalar qyzmetinde «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ óńirlik damý jáne ádisnama departamentiniń basshysy Marǵulan Ábdikárimov múlik ıeleriniń birlestigi kommýnaldyq boryshtardy qalaı óndiretinin túsindirdi.
«Árbir páter ıesi menshigindegi páterden bólek kondomınıým nysanynyń ortaq múliginde úlesi bar ekenin túsinýi kerek. Ol osy úles úshin jaýapkershilik arqalaıdy. ıAǵnı ortaq múliktegi úlesin kútip ustaý shyǵyndaryn óteýge mindetti. «Páterimdi jaýyp tastasam, qalǵan máseleniń maǵan qatysy joq» dep oılaýǵa bolmaıdy. Eger turǵyn úıde páter jaldaýshylar óte kóp bolsa, múlik ıeleriniń birlestigi «Azamattarǵa arnalǵan úkimet» mekemesine júginip, advokattyń kómegimen álgi páterdiń menshik ıeleri týraly aqparat surata alady», - deıdi aktsıonerlik qoǵam ókili.
Marǵulan Ábdikárimov ortaq múliktiń ortaq shyǵyndaryn tóleýge qulyqsyz adamdardy MIB aıasynda qalaı tártipke shaqyrýǵa bolatynyn túsindirip ótti.
«Kommýnaldyq shyǵyndar men ózge tólemderdi tóleýge qulyqsyz páter ıelerine qatysty zań 2019 jyly barynsha ońtaılandyryldy. Engizilgen túzetýler boıynsha ortaq múlikti basqarýshy organ boryshkerler paıda bolǵan jaǵdaıda jeke notarıýsqa ótinishpen júgine alady. Ótinishpen birge boryshker týraly anyqtama men tólenbegen túbirtekter tapsyrylady. Jıyn arqyly bekitilgen tarıfter de kórsetilýi kerek. Osy qujattardyń bárin teksergennen keıin notarıat bazasynda atqarý paraǵyn rásimdeıdi. 10 kúnniń ishinde boryshker qaryzyn tólemese nemese qarsy dálel keltirmese, atqarý paraǵy sotqa joldanady. Jeke sot oryndaýshy qujatty qabyldaǵannan keıin aqshany óndirýge kirisedi. ıAǵnı, sot oryndaýshy boryshkerdiń qarajatyna, basqa qalaǵa shyǵýyna shekteýler qoıýǵa quqyly», - deıdi maman.
Onyń aıtýynsha, «umytshaq» boryshkerler sot oryndaýshysymen sóıleskennen keıin tıisti tólemdi ýaqtyly tóleı bastaıtyn kórinedi.