Múlik ıeleri birlestigi reformasynda qatty qatelikke urynǵan sııaqtymyz – Prezıdent

ASTANA. QazAqparat – Teńgerimdi ınfraqurylymdyq saıasat qajet. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Problemalardyń taǵy biri – bul qalalardyń abattandyrylýy. Bul máselemen barlyq deńgeıdegi ákimder aınalysýy tıis. Óńirlerdiń damý deńgeıin áleýmettik-ekonomıkalyq faktorlarmen qatar ǵımarattardyń syrtqy kelbeti, olardyń sanıtarlyq normalarǵa sáıkestigi, aýmaqtyń kógaldandyrylýy, qoǵamdyq keńistiktiń jaı-kúıi, balalarǵa arnalǵan sporttyq alańdardyń bolýy jáne basqa da máselermen aıqyndalatyndyǵy belgili», - dedi Prezıdent.

Memleket basshysy qoǵamda turǵyn úı qoryn tıimdi basqarý máselesi de óte belsendi talqyǵa túsetindigine basa nazar aýdartty.

«Múlik ıeleri birlestigi ınstıtýtyn engizýge baǵyttalǵan reforma sońyna deıin jetkizilgen joq. Buǵan qosa, múlik ıeleri birlestikterimen qatar páter ıeleri kopperatıvterdi de áli jumys istep tur. Biz osy Múlik ıeleri birlestigi reformasynda qatty qatelikke urynǵan sııaqtymyz. Qazirgi ýaqytta muny únemi kim usynǵanyn aıtý kesh. Biraq, qazir Úkimet ákimdermen birge osy jaǵdaıdan shyǵý jolyn tabýy tıis. Óıtkeni, jaǵdaı barynsha kúrdeli. Mundaı jaǵdaıdaǵy basty mindet – adamdardy sapaly ári ashyq qyzmettermen qamtamasyz etý mindeti oryndalmaýda. Buǵan qosa, atalǵan reforma jergilikti ózin ózi basqarý júıesinde birinshi satyny qurýdy kózdegen edi. Sondyqtan osynaý mindetti laıyqty nazardan tys qaldyrýǵa bolmaıdy. Jalpy, teńgerimdi ınfraqurylymdyq saıasat qajet», - dedi Qasym-Jomart Toqaev.

Aıta keteıik, Úkimet úıinde Prezıdent tóraǵalyǵymen eldiń áleýmettik-ekonomıkalyq damý máseleleri jóninde keńes ótip jatyr.