Muqtaj jandardyń ıpoteka syıaqysy mólsherlemesiniń bóligi sýbsıdııalanady

<p>ASTANA. KAZINFORM &ndash; 4 jeltoqsanda turǵyn úı salasyndaǵy saıasatty reformalaý maqsatynda keıbir zańnamalyq aktilerge engizilgen ózgerister kúshine endi.&nbsp;</p>

Oǵan saı, turǵyn úı jaǵdaılaryn jaqsartý úshin kórsetiletin memlekettik qoldaý sharalaryna mynandaı tolyqtyrýlar qosyldy:

- kvazımemlekettik sektor sýbektileri arqyly ıpotekalyq turǵyn úı nesıeleri boıynsha syıaqy mólsherlemesiniń bir bóligin sýbsıdııalaý;

- kvazımemlekettik sektor sýbektileri arqyly turǵyn úı salý úshin ekinshi deńgeıli bankterdiń jeke kásipkerlik sýbektilerine bergen nesıeleri boıynsha syıaqy mólsherlemelerin sýbsıdııalaý.

Sondaı-aq zańnamadaǵy ózgeristerge saı keıbir uǵymdar tolyqtyryldy, keıbir kórsetiletin qyzmetterdiń talaby ózgerdi. 

Atap aıtqanda, Qazaqstan Respýblıkasy azamattaryna olardyń ótinishterin arnaıy esepke tirkemeı jeke turǵyn úı qurylysy úshin jer ýchaskelerin berýge tyıym salyndy.

Turaqty birge turatyn erli-zaıyptylar, olardyń ortaq balalary nemese erli-zaıyptylardyń bireýiniń balalary (onyń ishinde asyrap alǵan, qorǵanshylyǵyndaǵy nemese qamqorlyǵyndaǵy balalar) úı ıesiniń otbasy músheleri dep tanyldy. Al jubaıynyń ata-anasy, sondaı-aq birge turatyn balalardyń otbasylary tek ózara kelisim boıynsha ǵana turǵyn úı ıesiniń otbasy múshesi dep tanylýy múmkin.

Halyqtyń áleýmettik osal tobyna asyraýynda kámeletke tolmaǵan jáne jalpy bilim beretin mektepterde, kolledjderde, joǵary oqý oryndarynda nemese kásiptik oqý oryndarynda kúndizgi bólimde oqıtyn (23 jasqa tolmaǵan) balalary bar jesirler (jalǵyzbasty ákeler) kiredi. 

Múgedektigi bar jandarǵa, sondaı-aq múgedek balasy bar otbasylarǵa, densaýlyq saqtaý salasyndaǵy ortalyq atqarýshy organ bekitken keıbir aýyr sozylmaly aýrýlar tiziliminde kórsetilgen dertke shaldyqqan naýqas qarttarǵa memlekettik turǵyn úı qorynan nemese jergilikti atqarýshy organ jekemenshik turǵyn úı qorynan jalǵa alǵan páter olardyń qalaýy eskerile otyryp, lıftisi bar kópqabatty turǵyn úıdiń tómengi qabattarynan, al tirek-qozǵalys apparatynyń qyzmeti buzylǵan múmkindigi shekteýli jandarǵa birinshi jáne ekinshi qabattardan ǵana beriledi. 

Zańnamadaǵy turǵyn úı salasyndaǵy memlekettik qoldaý sharalaryna qatysty ózgeristermen myna silteme arqyly tanysýǵa bolady.