Muqtaj azamattarǵa páter bóletin komıssııaǵa qoǵam ókilderin engizý mindettelmek

NUR-SULTAN. QazAqparat – Sybaılas jemqorlyqqa qarsy is-qımyl agenttiginiń Preventsııa departamentiniń basshysy Anar Jarovanyń aıtýynsha, atalmysh komıssııa quramyna qoǵam ókilderin engizý tártibi qoldanysta bar. Dese de, mindetti emes osy normany jergilikti ákimdikter oryndamaı otyr, dep habarlaıdy QazAqparat tilshisi.

«Turǵyn úıdi bólý kezinde ashyqtyqtyń bolmaýy da másele týyndatady. Páter bólý isin ákimdikterdiń turǵyn úı komıssııasy júrgizedi. Alaıda olardyń quramynda is júzinde qoǵam ókilderi joq. Mindetti bolmasa da, olardyń músheliginde keminde 3 qoǵam ókili bolýy kerektigi týraly norma ádette saqtalmaıdy. Qurylatyn turǵyn úı komıssııasynyń quramyna memlekettik jáne jergilikti atqarýshy organdardyń qyzmetkerleri ǵana kiredi», - dedi Anar Jarova agenttikte ótken baspasóz máslıhatynda.

Osyǵan baılanysty, olarǵa qoǵam ókilderin páter bólinisine qatystyrý týraly normany engize otyryp, turǵyn úı komıssııalary týraly úlgilik erejeni qaıta qaraý talap etiledi.

«Budan basqa, qabyldanatyn sheshimderdiń ashyqtyǵyn qamtamasyz etý maqsatynda onlaın translıatsııamen turǵyn úı komıssııasy otyrystaryn mindetti túrde aýdıo, beıne tirkeý qajet. Sondaı-aq, taldaý barysynda páterlerdi qabattarǵa bólýge baılanysty sybaılas jemqorlyq táýekelderi anyqtaldy. Bul másele normatıvtik túrde rettelmegen. Bul ákimdik qyzmetkerlerine óz qalaýy boıynsha sheshim qabyldaýǵa jaǵdaı jasap, belgili bir syıaqy úshin «suranysqa ıe qabattardy» bólýdiń sybaılas jemqorlyq táýekelin týyndatady. Bul jerde sheshim adam faktorynyń aralasýynsyz páterlerdi qabattarǵa bólý protsesi avtomattandyrylýy múmkin. Bul turǵyn úıdi bólý kezinde ashyqtyq pen aıqyndylyqty qamtamasyz etedi», - deıdi ol.

Aıta ketsek, buǵan deıin Anar Jarova memleketten beriletin turǵyn úı kezegi boıynsha kezdesken zańbuzýshylyqtardy ataǵan bolatyn.