Muhtar Tileýberdi oblys ákimi orynbasarlarynyń fýnktsıonaldyq mindetterin qaıta qaraýdy usyndy

NUR-SULTAN. QazAqparat – Búgin Úkimet otyrysynda QR Premer-Mınıstriniń orynbasary – Syrtqy ister mınıstri Muhtar Tileýberdi oblys ákimderi orynbasarlarynyń fýnktsıonaldyq mindetterin qaıta qaraýdy usyndy, dep habarlaıdy QazAqparat tilshisi.

«Investorlarmen naqty jumys isteý úshin 2012 jyly ınvestıtsııalarǵa jaýapty oblystar men respýblıkalyq mańyzy bar qalalar ákimderiniń arnaıy orynbasarlary laýazymy engizildi. Atalǵan shara óziniń tıimdiligin kórsetti. Alaıda jyldar óte kele ákimderdiń arnaýly orynbasarlarynyń fýnktsıonaly olarǵa beıindi emes mindetter júkteýmen shaıylyp ketti», - dedi ol.

Máselen, onyń atap ótýinshe, búgingi tańda Nur-Sultan qalasynda, Aqmola, Soltústik Qazaqstan jáne Mańǵystaý oblystarynda ǵana ákimderdiń arnaýly orynbasarlary tek ınvestıtsııa máselesimen aınalysady.

Qalǵan oblystarda olarǵa ınvestıtsııalarǵa shoǵyrlanýǵa múmkindik bermeıtin basqa da mindetter júktelgen.

«Sondyqtan óńir ákimderi orynbasarlarynyń fýnktsıonaldyq mindetterin qaıta qarap, ınvestıtsııa tartýǵa, bastapqy baǵdarǵa oralý qajet dep sanaımyn», - dedi Muhtar Tileýberdi.