Muhtar Tileýberdi BUU Adam quqyqtary jónindegi Joǵarǵy komıssarynyń Óńirlik ókilimen kezdesti

NUR-SULTAN. QazAqparat - Qazaqstan Premer-Mınıstriniń orynbasary - Syrtqy ister mınıstri Muhtar Tileýberdi BUU Adam quqyqtary jónindegi Joǵarǵy komıssary Basqarmasynyń (AQJKB) Ortalyq Azııa boıynsha Óńirlik ókili Ryshard Komendamen kezdesti, dep habarlaıdy QazAqparat QR SІM baspasóz qyzmetine silteme jasap.

Taraptar Qazaqstannyń BUU-nyń adam quqyqtary salasyndaǵy organdarymen jáne tetikterimen yntymaqtastyǵynyń ózekti kún tártibin talqylady. Mınıstr AQJKB-men jáne BUU qamqorlyǵymen jumys isteıtin táýelsiz quqyq qorǵaý tetikterimen ózara is-qımyl elimizdiń osy halyqaralyq uıymmen yntymaqtastyǵynyń basym baǵyttarynyń biri bolyp tabylatynyn atap ótti.

Osy turǵyda qazaqstandyq tarap BUU Adam quqyqtary jónindegi keńesine úsh jyldyq músheliginiń bastalýyna berilgen mańyzdylyǵyn atap ótip, BUU Adam quqyqtary jónindegi keńesiniń Jenevadaǵy 49-shy sessııasynyń joǵary segmentine qatysý nıetin rastady.

SІM basshysy BUU delegatsııasyn Qazaqstandaǵy qańtar oqıǵalarynyń sebepteri men saldary, sondaı-aq adam quqyqtary salasyndaǵy óziniń halyqaralyq mindettemelerin oryndaýdy qamtamasyz etý úshin memleket qabyldap jatqan keshendi sharalar týraly habardar etti. Ol adam quqyqtaryn buzý, sonyń ishinde zańsyz ustaý jáne qatygezdik týraly kez kelgen aqparat muqııat tekseriletinine sendirdi.