Muhtar Taıjan mınıstr Ermekbaevtyń meshitte ýaǵyzdy orys tilinde aıtý usynysyna qarsy shyqty

ASTANA. QazAqparat - Meshittegi ýaǵyz tek qazaq tilinde bolýy tıis. Bul týraly búgin elordada ótip jatqan «Qazirgi kezeńdegi ekstremızm men terrorızmniń aldyn alý men jolyn kesýdiń zańnamalyq jáne ınstıtýtsıonaldyq sharalary» taqyrybyndaǵy dóńgelek ústel otyrysynda «Bolathan Taıjan» qorynyń prezıdenti Muhtar Taıjan málim etti.

«Menińshe, ekstremızm men lańkestiktiń basty sebebi - kedeıshilik pen jumyssyzdyq. Sondyqtan osynda otyrǵan Úkimet músheleriniń jaýapkershiligi zor dep bilemin. Kommýnıkatsııalyq saıasat basqasha bolýy qajet. Elimizde kedeıshilik, jumyssyzdyq bolmaýy tıis. Óıtkeni elimiz baı. Elimizde 17-aq mıllıon adam bar. Qazirgi dúnıejúzilik ahýal ózgerip ketti. Sondyqtan biz Úkimetten basqa ekonomıkalyq saıasat kútip otyrmyz», - dedi ol.

M.Taıjan atalǵan qaýip-qaterdiń ekinshi negizgi sebebi bilim júıesindegi olqylyqtar degen oıyn bildirdi.

«Menińshe, osy 20 jyldyń ishinde, ókinishke oraı, bilim júıesi álsiz bolyp ketti. Bul salada da úlken reforma kerek dep oılaımyn. Kelesi ekstremızm men lańkestik sebebi - memlekettiń ádilettiligi. Qatelespesem, Platon «Memlekette ádildik bolmasa, onda ol memleket qurıdy» degen edi. Sondyqtan bizdiń elimizde ádilettilik óte joǵary deńgeıde bolýy kerek. Ádilettilik joǵary qundylyqqa aınalýy tıis»,-  dedi qor prezıdenti.

Sonymen qatar ol, jańadan qurylǵan Din isteri jáne azamattyq qoǵam mınıstri Nurlan Ermekbaev joǵarydaǵy máselelerge qatysty pikirin tek orys tilinde ǵana emes, qazaqsha  da bildirý kerek dep esepteıtindigin aıtty. «Óıtkeni, jastardyń basym kópshiligi qazaq tildi. Búgingi jastar sizdi túsinbeıdi. Sizdiń meshitterdegi ýaǵyz orys tilinde bolýy kerek degen sózińizdi qoldamaımyn. Meshitke baratyn jamaǵattyń 99 paıyzy qazaqtildi azamattar», - dedi ol mınıstrge qarata.