Muhtar Seńgirbaı: «100 jańa oqýlyq» urpaq sanasynda serpilis jasaıdy

ASTANA. QazAqparat - «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda aýdarylǵan oqýlyqtar ásirese aýyl balasy úshin zor qazyna. «Ulttyq aýdarma bıýrosy» arqyly oqýlyqty aýdarý jobasyna qatysqan Súleımen Demırel ýnıversıtetiniń aǵa oqytýshysy, saıasattaný boıynsha Fılosofııa doktory (PhD) Muhtar Seńgirbaı osyndaı pikir bildirdi, dep habarlaıdy QazAqparat.

Muhtar Seńgirbaıdyń aıtýynsha, atalǵan joba bolashaqqa baǵyttalǵan birneshe strategııalyq maqsatty oryndaıdy. Al onyń qazaq qoǵamyna, Qazaqstan halqynyń sanasyn oıatyp, dúnıetanymyn keńeıtýine qosar úlesi jyldar óte kele aıqyndalady. 

«Birinshiden, oqýlyqtar álemdik bilimniń jaýharlaryn qazaq tilinde oqyp, sanasy azat urpaq ósirýige múmkindik beredi. Aýdarylyp jatqan kitaptardyń arasynda orys tiline eshqashan aýdarylmaǵandary bar. ıAǵnı, aǵylshyn tilindegi tyń dúnıege qazaqtildi oqyrmannyń qoly birinshi jetedi degen sóz. Bul «jaqsy kitaptyń bári orys tilinde bolady» degen oıdan aryltady, ıaǵnı sanada serpilis jasaıdy. Bul - ásirese aýyl balalary úshin orny tolmas qazyna. Buǵan deıingi urpaqtarda táýelsiz sana qalyptastyrýda mundaı erekshe múmkindik bolǵan joq. Árıne, 18 oqýlyq ázirge teńizge tamǵan tamshydaı ǵana. Biraq, bul - azat sanaly urpaq qalyptastyrýǵa jasalǵan mańyzdy qadam», - deıdi Muhtar Seńgirbaı.

Sondaı-aq, aýdarmaǵa qatysqan ǵalym bul jobanyń erekshelegine de toqtalady. Onyń sózine qaraǵanda, joba ǵylymnyń túrli salalaryndaǵy akademııalyq stıldi, termınologııany júıelep, bekite túsýge múmkindik beredi.

«Qazaq tilinde ǵylymı til áli de qalyptasyp, damyp jatyr, bul joba osy protsesti júıelendirip, kemeldendire túsedi. Osy oqýlyqtar negizinde bilim alǵan jastar termınderdi jańa úlgide qoldana bastaıdy.  Úshinshiden, bul joba memlekettik tildiń qoǵamdaǵy rólin arttyryp, bedelin nyǵaıta túsedi. ıAǵnı, bul - qazaq tilin memlekettik til retinde ornyqtyra túsýdiń erekshe qadamy.  Kóp jaǵynan alyp qaraǵanda, oqýlyqtardy aýdarý jobasy - alys bolashaqqa baǵyttalǵan strategııalyq sheshim. Jáne bul iste tek memlekettiń, "Ulttyq aýdarma bıýrosynyń" jumysy jetkiliksiz bolmaq. Bul iske qoǵam ókilderi atsalysyp, úles qosýy kerek», - dep atap ótedi Muhtar Seńgirbaı.

Eske sala keteıik, keshe  Astanada «Qazaq tilindegi 100 jańa oqýlyq» jobasy aıasynda aýdarylǵan alǵashqy kitaptardyń tanystyrylymy ótti. Sharaǵa QR Prezıdenti Nursultan Nazarbaev qatysqan bolatyn.