Muhtar Mankeev: Joldaýdyń strategııalyq jospary - maqsatqa qalaı jetý kerektigin aıqyndap berdi

ASTANA. QazAqparat - Memleket basshysynyń Qazaqstan halqyna sany jaǵynan 23-shi Joldaýy - aldaǵy maqsattarǵa qalaı jetý kerektigin aıqyndap berdi. «Qazaqstan-2050» Jalpyulttyq qozǵalysy keńesiniń tóraǵasy Muhtar Mankeev Elbasynyń Joldaýyna qatysty osyndaı dep pikirin bildirdi, dep habarlaıdy QazAqparat tilshisi.

«Prezıdent Joldaýyn bárimiz estidik. Ózderińiz kórip otyrǵandaı, memlekettik úlken saıasattyń jańa baǵyty - áleýmettik qoǵamdy damytý, adamdardyń ómir sapasyn kóterý bolyp kele jatyr. Budan buryn «Rýhanı jańǵyrý» baǵdarlamasy sanamyzdy jańǵyrtýdy maqsat tutsa, «Bes áleýmettik bastama» aıasyndaǵy «7-20-25» baǵdarlamasy jańadan otaý tigip jatqan jastarǵa úlken qoldaý bolyp otyr. Al keshegi Joldaýda aıtylǵan naqty strategııalyq jospar - aldymyzǵa qoıǵan maqsattarǵa qalaı qol jetkizetinimizdi aıqyndap berdi», - dedi Muhtar Mankeev.

Onyń aıtýynsha, burynǵy bastamalarda jospar bolǵanymen, ol baǵyttar boıynsha bıýdjetten qansha qarajat shyqqaly otyrǵany atala bermeıtin.

«Al keshegi Joldaýda Elbasynyń ózi 1 trıllıon teńgeden astam qarajat qarastyrylǵanyn aıtty. ıAǵnı, naqty ár salaǵa qansha qarajattan bólinetinin Memleket basshysynyń ózi qadap atap ótti», - deıdi keńes tóraǵasy.

Muhtar Mankeev sonymen qatar, osy jolǵy Joldaýdy naqty jastarǵa arnalǵan Joldaý retinde qabyldaǵanyn aıtady.

«Sebebi, ózderińiz biletindeı 2005 jyldyń aqpan aıyndaǵy Joldaýynda Prezıdent jastarǵa arnalǵan úlken baǵdarlamalardy bastap bergen bolatyn. Ol kezde «Jasyl el» baǵdarlamasy qolǵa alynyp, stýdenttik otrıadtar jumysyn bastaǵan. Sol sekildi jastarǵa naqty baǵyttar osy Joldaýda da qarastyrylyp otyr. 2019 jyly «Jastar jyly» dep jarııalanady. Aldymyzda úlken ózgerister kele jatyr. Ol ózgeristerdi jastarmen birge júzege asyrmasaq, olarǵa tek joǵarydan otyryp, baqylaǵymyz kelse - josparly jumys esh nátıje bermeıtinin bárimiz bilemiz», - deıdi Muhtar Mankeev.

«Qazaqstan-2050» Jalpyulttyq qozǵalysy keńesiniń tóraǵasy óz sózinde bıyldan bastap qoıylǵan maqsattarǵa qalaı jetý kerektigin jastarmen talqylaı otyryp, jetý kerektigin tilge tıek etti.

«Jastar saıasaty - kishigirim semınar, forým nemese jıyn ótkizý emes, jastardyń júıeli máseleleriniń birlese sheshimin tabý. Sondyqtan, bul Prezıdenttiń 23-shi Joldaýy - naqty, tehnokratty, jospary men bıýdjeti bar Joldaý boldy. Bul jerde kóp oılanar eshteńe joq. Bárimiz birlese jumys isteýge daıynbyz», - dep túıdi Muhtar Mankeev.