Muhtar Maǵaýın — aıryqsha eńbegi bar aıtýly qalamger — Ábish Kekilbaıulynyń esteliginen

<p>ASTANA. KAZINFORM &mdash; 2000 jyly kórnekti jazýshy, memleket jáne qoǵam qaıratkeri Ábish Kekilbaıuly Qazaqstannyń halyq jazýshysy Muhtar Maǵaýınniń músheltoıyna oraı esteligin jazǵan.</p>

Bul estelikti Á. Kekilbaıulynyń nemeresi Abyl Kekilbaev óziniń áleýmettik jelidegi paraqshasynda jarııalady. 

— Áli kóz aldymda. Ýnıversıtetke jańa túskenbiz. Bir-birimizdi jóndi bilmeımiz. Oqýdy endi bastaǵaly jatyrmyz. Kúngeı bettegi aýdıtorııa. Tereze jaqtaǵy sońǵy qatar. Qasyma bıdaı óńdi beıtanys jigit keldi. Ústinde shı barqyt keýdeshe. Basynda jıegi kestelengen qazaqy taqııa. Baýyrsaq murynnyń ushy ántek jyltyraıdy. Jymıyp kúlip turǵan sııaqty. — Men — Muhtar Maǵaýınmin. Shubartaýdanmyn. Medalıspin. Otarda astyqta boldym, — deıdi aýyzyn ashar-ashpastan jáı-japsaryn túgel aqtaryp. Sodan qaı sabaqta da, qaı aýdıtorııada da jup jazbaı birge otyratyn boldyq. Ol jyly oqýǵa kóbine-kóp eki jyl jumys istegen, áskerde bolǵan saqa jigitter alynǵan, — delingen Ábish Kekilbaıulynyń qalamdas dosynyń músheltoıyna oraı jazǵan esteliginde.

Sonymen qatar onda áýelden-aq ádebıetimizge kóp nárselerge tosyn kózqarasymen, batyl pikirlerimen bólekshe kózge túsip kelgen Muhtar Maǵaýın — búgingi urpaqtardyń da, keleshek urpaqtardyń da aldynda aıryqsha eńbegi bar aıtýly qalamger ekeni atalyp ótken.

— Muhtar Maǵaýınniń ótken jaıly prozasy da, búgin jaıly prozasy da dál osy talapqa tolyǵymen jaýap beredi. Onyń romandary, áńgimeleri men hıkaıattary tól ádebıetimizdiń paıymdyq-parasattyq deńgeıin tereńdetken, kórkemdik-beıneleýshilik deńgeıin bıiktetken súbeli úles boldy, — dep atalyp ótken memleket jáne qoǵam qaıratkeriniń jazbasynda.

Eske sala ketsek, 10 qańtarda belgili jazýshy Muhtar Maǵaýın AQSh-ta 85 jasynda dúnıeden ozdy. 

2021 jyly Ábish Kekilbaevtyń avıator nemeresi Abylmen eksklıýzıv suhbatty jarııalaǵan edik.