Muhtar Maǵaýın 77 jasta
HH ǵasyrdyń 60-jyldary qazaq prozasyna M.Maǵaýın, Á.Kekilbaev, O.Bókeı, D.Isabekov, T.Ábdikov syndy asa daryndy jastar legi keldi. Zańǵar jazýshy Ǵ.Músirepov: «Muhtar Maǵaýın ana tilimizdiń baılyǵyn, oralymdy, astarly, ári ot-jalyndy, ári názik te bııazy boıaý-syrlaryn alǵashqy adymdarynan bastap-aq kórsetedi. Tilimizdiń oralymdyǵyn tereńdetýge qosqan úlesi az emes», - dep, M.Maǵaýınge shynaıy anyqtama bergen de bolatyn. Al onymen qatarlas, qalamdas jazýshy Á.Kekilbaev: «Muhtar Maǵaýın - daǵdarys tyǵyryǵyna qamalǵan ádebıetimizdiń odan ári damýyna jańa qarqyn bitirýge tyrysqan alpysynshy jyldardaǵy serpiliste aıryqsha kózge túsip, sol qarqynyn áli kúnge údetpese, báseńdetpeı, janqııarlyq tanytyp kele jatqan kesek tulǵamyz. Onyń búgingi de, erteńgi de oqyrmandar aldynda sińirgen eńbegi ushan-teńiz. Qadym zamandar taqyrybyna alǵash qadam tartqan ǵalym retinde ulttyq kórkem oıdyń eń kemel kúshteriniń tól tarıhymyzdyń kende zerdelenip kele jatqan kezenderin kórsetýge jappaı jumylýyna túrtki boldy. Ózi de sol báıgede ozyp shyǵa alǵan júldeli júırik», - dep baǵalady.
M.Maǵaýın ár jyldary «Qazaq ádebıetinde», «Jazýshy» baspasynda, «Jalyn» jýrnalynda qyzmet etti. «Keshqurym» atty alǵashqy áńgimesi 1964 jyly «Juldyz» jýrnalynda jarııalandy. Keıingi jyldary ol «Aqsha qar», «Bir atanyń balalary», «Qııandaǵy qystaý», «Kók kepter» povester men áńgime jınaqtaryn, «Kók munar», «Shaqan sheri» romandaryn, «Alasapyran» roman-dılogııasyn, «Qobyz saryny» atty monografııany, «Ǵasyrlar bederi», «Qazaq tarıhynyń álippesi» ǵylymı-zertteý eńbekterin, «Qazaq handyǵy dáýirindegi ádebıet» oqýlyqtaryn, hrestomatııa jáne basqa da oqý quraldaryn jazdy.
«Aldaspan», «Bes ǵasyr jyrlaıdy», «Aı zaman-aı, zaman-aı» aqyn-jyraý shyǵarmalary jınaqtalǵan antologııany da M.Maǵaýın qurastyrǵan. Onyń shyǵarmalary álemniń birneshe tilderine aýdarylǵan. 1984 jyly Memleket syılyǵynyń laýreaty jáne 1996 jyly Qazaqstannyń halyq jazýshysy atandy.
M.Maǵaýın 2007 jyly Chehııaǵa qonys aýdardy. Jazýshy qazir Amerıka Qurama Shtattarynda turady. Jaqynda ol jeti jyl boıy jazǵan «Shyńǵys han» epopeıasynyń sońǵy, tórtinshi kitabyn aıaqtaǵanyn málim etti.