Muhtar Áýezov teatry Túrkııada zor qoshemetke ıe boldy

ASTANA. QazAqparat - Muhtar Áýezov atyndaǵy qazaq memlekettik akademııalyq drama teatry Túrkııanyń Adana qalasyna gastroldik saparmen baryp qaıtty, dep habarlaıdy QazAqparat tilshisi.

Elbasynyń «Bolashaqqa baǵdar: Rýhanı jańǵyrý» baǵdarlamasy aıasynda teatr ártisteri Iran-Ǵaıyptyń «Qorqyttyń kóri» qoıylymyn qoıyp, úlken qoshemetke bólendi.

«Jalpy, mádenıetimizdiń ozyq túrlerin álemdik deńgeıge kóterilýi, básekege qabiletti halyqaralyq deńgeıde qyzmet etý bizdiń teatr úshin de, ult úshin de óte mańyzdy. Mádenıet ulttyń ar-namysy, júregi, bolmysy bolǵandyqtan, bir jyldyń ishinde bizdiń teatr halyqaralyq eki-úsh saparlarǵa shyǵyp óner kórsetti. Mine, túbimiz bir Túrik eliniń ońtústiginde ornalasqan Adana qalasynda ónerimizdi kórsetip úlken bir qoshemetke bólenip qaıttyq. Jalpy eki eldiń, túrki áleminiń arasyndaǵy rýhanı baılanysty nyǵaıtý barysynda osy sharaǵa bizdiń teatr álemdik ozyq deńgeıde óner kórsete aldy deı oılaımyn»,- deıdi akter Bekjan Turys.

   Qoıylymda Qorqytty somdaǵan Qazaqstannyń eńbek sińirgen qaıratkeri Dýlyǵa Aqmolda qoıylym aıaqtalǵan soń, jınalǵan barlyq túrik baýyrlardyń, Adana sahnasynda qoıylymdy tamashalaǵan kórermenderdiń aldynda qazaq halqynyń egemendigin tanyp, alǵash ret qoldaý kórsetken túrki halqy ekenin, ony eshqashanda qazaq halqy umytpaıtynyn aıtty.

Akter óz sózinde, Qazaqstan men Túrkııa memleketteriniń arasyndaǵy dostyq, mádenı baılanys sodan beri óziniń jalǵasyn taýyp kele jatqanyn, Ákemteatr ujymy Túrkııa elinde osymenen tórtinshi ret gastroldik saparmen kelip jatqanyn tilge tıek etti.

Sapar barysynda túbi bir túrki halyqtaryn jaqyndatý maqsatynda Adana qalasynda teatr festıvalinen bólek, kıno festıvalderde uıymdastyrylǵan. Teatr akteri, Qazaqstannyń eńbek sińirgen qaıratkeri Baýyrjan Qaptaǵaı jalpy túrki álemine ortaq Qorqyt týraly qoıylymy men akterlardyń sheberligine túrik aǵaıyndardyń yqylasynan óte joǵary baǵa bergenderin baıqaǵanyn, qazaq teatrynda da osyndaı úlken dúnıeler bar ekenin dáleldegenin aıtty.

Sapar barysynda M.Áýezov teatry baýyrlas túrki halyqtarynyń rýhanı qundylyqtaryn, mádenı baılanysyn odan ári óristetip, mádenı-rýhanı tájirıbe almasýdy jalǵastyrýda túrki álemine ortaq abyz, qobyz atasy Qorqyt týraly qoıylym arqyly laıyqty úles qosyp qaıtty.