Muhtar Ábilıazovtiń sybaılasy Qazaqstanǵa 6,3 mlrd teńge qaıtardy

NUR-SULTAN. QazAqparat –«BTA Banki» AQ Dırektorlar keńesiniń burynǵy tóraǵasy Muhtar Ábilıazovtiń sybaılasy Qazaqstanǵa 6,3 mlrd teńge qaıtardy. Bul týraly Sybaılas jemqorlyqqa qarsy is-qımyl agenttiginen málim etti, dep habarlaıdy QazAqparat.

«QR Sybaılas jemqorlyqqa qarsy qyzmeti QR Bas prokýratýrasymen birlesip, «BTA Banki» AQ-nyń dırektorlar Keńesiniń burynǵy tóraǵasy Muhtar Ábilıazov pen onyń sybaılastaryna qatysty sotqa deıingi tergeýdi jalǵastyrýda.

Qazirgi ýaqytta qylmystyq top keltirgen zalaldyń 6,3 mlrd teńgesi qosymsha óteldi.

Bul – Máskeý qalasyndaǵy iri bıznes-ortalyǵynyń qurylysyna salynǵan jáne Ábilıazovtiń baqylaýyndaǵy offshorlyq kompanııaǵa qaıtarymsyz nesıe berý arqyly jymqyrylǵan BTA bankiniń qarajaty bolyp tabylady.

Qazaqstanǵa sot tóreliginen jasyrynyp júrgen tulǵalardy ekstradıtsııalaý jáne óz erkimen qaıtarý, basqa qylmystyq epızodtar aıasynda keltirilgen zalaldy óteý boıynsha jumystar jalǵasýda», - delingen agenttik aqparatynda.