Muhtar Ábilıazovtiń sybaılasy BAÁ-den ekstradıtsııalandy

NUR-SULTAN. QazAqparat - Birikken Arab Ámirlikterinen Muhtar Ábilıazovtyń sybaılasy ekstradıtsııalandy. Bul týraly QazAqparat Bas prokýratýranyń baspasóz qyzmetine silteme jasap habarlaıdy.

Bas prokýratýra men Sybaılas jemqorlyqqa qarsy is-qımyl agenttiginiń qyzmetkerleri Birikken Arab Ámirlikterinen BTA Bankiniń burynǵy basqarýshy dırektory Rýstam Ibragımovty Qazaqstanǵa ekstradıtsııalady.

Ibragımov BTA Bankiniń 250 mln AQSh dollary qarajatyn Muhtar Ábilıazovtyń uıymdasqan qylmystyq tobynyń múshelerimen birlesip jasaǵan urlyǵy úshin izdeýde bolǵan.

Qylmystyq jaýapkershilikten jaltarý maqsatynda ol, BAÁ-de Qyrǵyzstan azamatynyń jalǵan tólqujatyn paıdalanyp jasyrynǵan.

Alaıda, qazaqstandyq quqyq qorǵaý organdarynyń arab jáne qyrǵyz áriptesterimen birlese atqarǵan jumysynyń nátıjesinde, sondaı-aq BAÁ-degi Qazaqstan elshiliginiń kómegimen joǵaryda atalǵan tólqujat zańsyz dep tanylyp, qylmysker ustalyp Qazaqstan Respýblıkasyna ekstradıtsııalandy.

Qazirgi ýaqytta Ibragımov Almatydaǵy tergeý ızolıatoryna qamaldy.