Muhamedsabyr Bazarbaıulyna tájirıbe jetispeı qaldy - Myrzaǵalı Aıtjanov

<p>ASTANA. KAZINFORM &ndash; Bokstan Ulttyq quramanyń bas bapkeri Myrzaǵalı Aıtjanov Italııanyń Býsto-Arsıtsıo qalasynda ótken halyqaralyq lıtsenzııalyq týrnırde 63,5 keli salmaqta Muhamedsabyr Bazarbaıulynyń ne úshin jarysty erte aıaqtaǵanyn túsindirip berdi.</p>

«Shyndyǵyn aıtý kerek, bizdiń quramada 63,5 keli salmaqta naqty áli bir kóshbasshy bolyp turǵan boksshy joq. Ár halyqaralyq týrnırde ár túrli boksshy aparyp júrmiz. Bul salmaqta Azııa oıyndaryna barǵan boksshymyz murynyn syndyryp alǵan edi. Qazir qatarǵa qosylyp, oqý-jattyǵý jıyndarynda júr. Endi, lıtsenzııalyq týrnırge alyp barǵan Bazarbaıulyna toqtalyp ótsem, ol Italııada negizi jaqsy judyryqtasty. Oǵan tek tájirıbe jetispeı qaldy. Óte asyǵys qımyldar jasady, judyryqtasqan osy eken dep birden tóbelesip ketti. Boks degenimiz tóbeles emes. Biz sony uǵynýymyz kerek. Boksta qol-aıaqpen birge basty da istete bilý kerek. Aqylmen judyryqtasý jeńiske alyp keledi», - dedi bas bapker.

Sonymen qatar Aıtjanov endi kelesi Bankgokta (Taıland) 23 mamyr men 3 maýsym aralyǵynda ótetin irikteý týrnırine Bazarbaıulyn aparý-aparmaý týraly pikirimen de bólisti.

«Taılandqa deıin áli ýaqyt bar. Ol lıtsenzııalyq týrnırge kimniń baratynyn áli sheshken joqpyz. Aqyldasamyz, osy salmaqtaǵy boksshylardy salystyryp, týrnırge jaqyndaǵanda kimniń baratynyn naqty sheshemiz», - deıdi Aıtjanov.

Esterińizge sala keteıik, osyǵan deıin bas bapker shákirtteriniń jetistigine razy bolǵanyn aıtyp bergen edi.

Aıta keteıik, bokstan Qazaqstan erler quramasynyń qorjynynda búginge deıin alty joldama bar. Olardy Sáken Bıbosynov (51 kg), Mahmud Sabyrhan (57 kg), Aslanbek Shymbergenov (71 kg), Nurbek Oralbaı (80 kg), Aıbek Oralbaı (92 kg) jáne Qamshybek Qońqabaev (+92 kg) jeńip aldy.