Muhamedıuly Ýnıversıada jeńimpazdarynyń bapkerlerin marapattady

ASTANA. QazAqparat - QR Mádenıet jáne sport mınıstri Arystanbek Muhamedıuly Almatyda ótken 28-shi Búkilálemdik qysqy Ýnıversıadada Qazaqstannyń joǵary jetistikterge jetýine úles qosqan bas jattyqtyrýshylarmen kezdesti, dep habarlaıdy «QazAqparat» HAA tilshisi.

Mınıstr Qazaqstan quramasynyń táýelsiz el tarıhynda jáne otandyq sportshylardyń Ýnıversıadalarǵa qatysý shejiresinde alǵash ret ekinshi orynǵa taban tiregenin atap ótti jáne Ýnıversıada oıyndary kezinde úzdik nátıje kórsetken sportshylardyń bas jattyqtyrýshylaryn marapattady. Atap aıtqanda, short-trekten bas jattyqtyrýshy Mádiǵalı Qarsybekov, konkımen mánerlep syrǵanaý boıynsha bas jattyqtyrýshy Quralaı Ýzýrova, shańǵy jarysynan bas jattyqtyrýshy Aleksandr Batıaıkın, frıstaıl-mogýldan aǵa jattyqtyrýshy Elena Krýglyhına, frıstaıl akrobatıkadan bas jattyqtyrýshy Murat Ablıatıfov, bıatlonnan bas jattyqtyrýshy Mıhaıl Dýdchenko jáne shaıbaly hokkeıden bas jattyqtyrýshy Sergeı Starygın QR Mádenıet mınıstriniń Alǵys hattarymen marapattaldy. 

«Qysqy sport túrleri erekshe aýa raıy jaǵdaıyn talap etetindikten, Ýnıversıada aıaqtalysymen túrli lıtsenzııalyq jarystarǵa ketken sizderdi mazalaýdy jón kórmedik.  Endi mine, QR Otan qorǵaýshy kúni jáne Ekinshi dúnıejúzilik soǵysyndaǵy Jeńis kúni qarsańynda sizdermen emen-jarqyn júzdesip otyrmyz. Qazaqstannyń joǵary jetistikterge qol jetkizgeni úshin jáne joǵary sanatty sportshylardy daıarlaýdaǵy jemisti qyzmetterińizge alǵys bildirgim keledi», - dedi QR Mádenıet jáne sport mınıstri A.Muhamedıuly. 

Mınıstr ár sport túriniń jetistikterine, marapat tuǵyrynan kóringen sportshylarǵa jeke-jeke toqtaldy jáne 2018 jyly ótetin Olımpıada oıyndaryna sát-sapar tiledi.

Eske sala ketsek, 2017 jyldyń 29 qańtary men 8 aqpany aralyǵynda Almatyda HHVІІІ Búkilálemdik qysqy Ýnıversıada oıyndary ótti. Qazaqstan ulttyq quramasy 36 júlde jeńip aldy, onyń ishinde 11 - altyn, 8 - kúmis, 17 - qola medal.