Muhamedıuly el qorjynyna «altyn» salǵan Dıas Bahrıddındi quttyqtady

ASTANA. QazAqparat - QR Mádenıet jáne sport mınıstri Arystanbek Muhamedıuly Jasóspirimder olımpıadasynda altyn medal jeńip alǵan eskek esýshi Dıas Bahrıddındi quttyqtady, dep habarlaıdy QazAqparat tilshisi.

«Táýelsiz Qazaqstannyń sport tarıhynda eskek esýden tarıhı jeńis oryn alyp otyr. Nebári 16 jasyńyzda Jasóspirimder Olımpıada oıyndarynda altyn medal aldyńyz. Sizdiń sporttyq mansabyńyzda bul - alǵashqy jarqyn jeńis. Men Sizden Olımpıada oıyndarynda taǵy da jarqyn jeńister kútemin», - dedi mınıstr quttyqtaýynda.

Mınıstr bul jeńis jas sportshynyń erik-jigeriniń myqtylyǵyn, kásibı daıarlyǵynyń joǵary ekendigin dáleldegenin aıtty.

«Búkil álem halqynyń aldynda Qazaq eliniń ánuranyn kókte sharyqtatý arqyly sońyńyzdan ergen jas sportshylardyń júregine jeńiske degen senim uıalattyńyz. Sizdeı qazaqtyń dara uldary barda el sporty qaryshtap damıtynyna senimdimin. Sizge zor densaýlyq, otbasyńyzǵa amandyq, bolashaqta úlken jeńister tileımin»- delingen mınıstrdiń quttyqtaý hatynda.

Esterińizge salaıyq, Dıas Bahrıddın 1:54:66 kórsetkishimen, ózbek sportshysynan basym túsip, birinshi oryn alǵan bolatyn. Buǵan deıin eskek esýshi Stella Sýhanova Jasópirimder olımpıadasynda qola medaldi enshilegen.

Aıta keteıik, III Jazǵy Jasóspirimder Olımpıada oıyndary Býenos -Aıres qalasynda qazannyń  6 - 18 aralyǵynda ótip jatyr. El namysyn 22 sport túri boıynsha 57 sportshy qorǵaýda.