Múgedektik jónindegi járdemaqynyń ortasha mólsheri 52 609 teńge boldy

NUR-SULTAN. QazAqparat - Jyl basynan beri múgedekter men asyraýshysynan aıyrylǵan jandarǵa járdemaqy túrinde 104,6 mlrd teńgeden astam qarajat tólendi, dep habarlaıdy QazAqparat.

Eńbek jáne halyqty áleýmettik qorǵaý mınıstrliginiń málimetine qaraǵanda, bıylǵy naýryz aıynda respýblıkalyq bıýdjetten múgedektigi boıynsha áleýmettik járdemaqyǵa 27,6 mlrd teńge, asyraýshysynan aıyrylý jaǵdaıyna baılanysty 7,7 mlrd teńge jumsaldy.

«2022 jylǵy 1 sáýirde áleýmettik járdemaqy alýshylardyń sany 525 myń adamdy, asyraýshysynan aıyrylý jaǵdaıy boıynsha 174,3 myń adamdy qurady. Olarǵa tólenetin járdemaqylardyń mólsheri múgedektik tobyna jáne sebebine, qaıtys bolǵan (qaza tapqan) asyraýshynyń asyraýyndaǵy adamdar sanyna, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilenetin eń tómen kúnkóris deńgeıiniń shamasyna baılanysty. Sáýirde múgedektik jónindegi áleýmettik járdemaqynyń ortasha mólsheri 52 609 teńgeni, asyraýshydan aıyrylý jaǵdaıynda 43 957 teńgeni qurady», - dep jazylǵan habarlamada.