Múgedektigi bar jandarǵa qoljetimdi nysandar standartyn qaıta qaraý kerek – mınıstr

NUR-SULTAN. QazAqparat – Qazaqstanda 25 myńǵa jýyq nysan múgedektigi bar azamattarǵa beıimdelgen, alaıda onyń 23 paıyzy ǵana bekitilgen standarttarǵa saı keledi. Bul týraly QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Nysandardyń qoljetimdi bolýy nemese «kedergisiz» ortany qurý – múgedektigi bar adamdardyń qoǵamǵa kirigip, tolyq aralasýyna qajet negizgi faktordyń biri. Sondyqtan, «Qoljetimdi nysandardyń ınteraktıvti kartasy» ázirlenip, turaqty jumys istep tur. Bul kartany jergilikti atqarýshy organdar udaıy tolyqtyryp otyrady. Al, nysandardyń qoljetimdigin múgedektigi bar azamattardyń ózderi jáne osy saladaǵy qoǵamdyq birlestikter baǵalaıdy», - dedi Tamara Dúısenova Úkimettiń búgingi otyrysynda.

Jergilikti atqarýshy organdardyń deregine júginsek, búginde 25 myńǵa jýyq nysan múgedektigi bar azamattarǵa beıimdelgen. Alaıda onyń 23 paıyzy ǵana bekitilgen standarttarǵa saı keledi.

«Bul protseske qatysýshylardyń belsendiligi pandemııaǵa baılanysty edáýir tómendegenin moıyndaý kerek. Osyǵan oraı jergilikti atqarýshy organdar obektilerdiń qoljetimdiligine qoǵamdyq baqylaý júrgizýdi jalǵastyryp, beıimdeýdi qajet etetin nysandar tizbesin ózektendirýi kerek. Al Indýstrııa jáne ınfraqurylymdyq damý mınıstrligi nysandardyń qoljetimdiligin qamtamasyz etetin ulttyq standarttardy qaıta qaraǵany abzal», - dedi Tamara Dúısenova.