Múgedektigi bar balalardy qorlaǵan stýdent 7 jylǵa deıin qamalýy múmkin

ASTANA. QazAqparat – Astanadaǵy hospıs patsıentteri men múgedektigi bar balalardy azaptaǵan medıtsınalyq stýdenttiń isi sońǵy satyda. Aıyptalýshynyń ózi áli de úıqamaqta otyr, dep habarlaıdy QazAqparat tilshisi.

Birqatar BAQ habarlaǵandaı, stýdent Astana hospısinde dementsııasy bar qart adamdardy uryp-soǵyp, nájisin jeýge májbúr etken. Keıin ońaltý ortalyǵynda múgedek balalardy azaptaǵan.

«Іs búginde sońǵy satysynda. Nátıjeleri boıynsha qorytyndy protsessýaldyq sheshim qabyldanatyn bolady. Sotqa deıingi tergeý aıaqtaldy. Sonymen qatar, kúdiktiniń advokaty materıaldarmen bir aı boıy tanysyp jatyr», - dep jazdy Bala quqyqtary jónindegi ýákil Dınara Zákıeva.

Bala quqyqtary jónindegi ýákil Bas prokýratýramen baılanysta ekenin jáne máseleni baqylaýda ustaıtynyn aıtty.

«Meniń oıymsha, mundaı áreketterge zańnyń barlyq qatańdyǵy qarastyrylýy kerek», - dep tolyqtyrdy ol.

Elordalyq polıtsııa da qylmystyq is sotqa deıingi tergeý materıaldarymen tanysý satysynda turǵanyn túsindirdi.

«22 jastaǵy kúdiktige qatysty qylmystyq is QR Qylmystyq kodeksi 110-baby 2-tarmaǵynyń 2-bóligi («Azaptaý») boıynsha tergelip jatyr. Kúdikti 2023 jyldyń sáýirinen bastap úı qamaýynda boldy, buǵan deıin bultartpaý sharasy taǵaıyndalǵan joq. Bul baptyń sanktsııasy 4 jyldan 7 jylǵa deıin bas bostandyǵyn shekteýdi ne sol merzimge bas bostandyǵynan aıyrýdy kózdeıdi», - dep habarlady polıtsııa.