Múgedektigi bar balalar úshin ushaq bıletteri tegin bolsyn - depýtat Erlan Ábdıev

ASTANA. QazAqparat – Parlament Májilisiniń depýtaty Erlan Ábdıev múgedektigi bar jandardy jeńildetilgen áýe tasymalymen qamtý máselesin kóterdi, dep habarlaıdy QazAqparat tilshisi.

«Memleket basshysy elimizde ınklıýzıvti qoǵam qurýǵa kóp kóńil bóledi. Qazirdiń ózinde belgili bir nátıjeler bar. Búgin meniń Májiliste sóılep turǵanym da – júrgizilip jatqan reformalar jetistikteriniń biri. Alaıda, ınklıýzıvti qoǵam bir kúnde qurylmaıdy. Inklıýzııa bizdiń ómirimizdiń barlyq salalaryna enýi úshin oǵan tek úkimet qana emes, sonymen birge qoǵamdyq qatynastardyń barlyq sýbektileri de qatysýy kerek. Onyń ishinde jeke bıznes te bar.

Búgingi kúni múgedektigi bar adamdardy áýe kóligimen tasymaldaýda qoljetimsizdik máselesi kezdesedi. Ushaqqa bılet satyp alý múmkin emes, jeńildikter jáne odan da bólek tegin ushý múmkindigi qarastyrylmaǵan. Bılet quny kóbinese bir aılyq áleýmettik tólem kóleminen asyp ketedi», - dedi Erlan Ábdıev Májilistiń jalpy otyrysynda Premer-Mınıstrdiń birinshi orynbasary Roman Sklıarǵa saýal joldaı otyryp.

Sondaı-aq, ol múgedektigi bar jolaýshylardyń ushý aqysyna jeńildik beriletin halyqaralyq tájirıbeniń baryn alǵa tartty.

«Sheteldik kompanııa bizdiń naryqqa osyndaı jeńildikter paketimen kirdi. Biraq, kóp uzamaı ol basqa tasymaldaýshylarǵa nazar aýdara otyryp, saıasatyn ózgertip jiberdi.

Búgingi tańda elimizde І jáne ІІ toptaǵy múgedektigi bar adamdardyń sany – shamamen 340 myń jáne 80 myńǵa jýyq balanyń múgedektigi bar. Memleket sýbsıdııalaıtyn bizdiń avıakompanııalarymyzdyń, ınklıýzıvti qoǵam qurýǵa óz úlesin qosýǵa múmkindigi joq bolǵany ma? Másele múmkindikte emes, másele úles qosamyn degen nıette ekenine senimdimin», - deıdi ol.

Osylaısha, Erlan Ábdıev múgedektigi bar jandardyń ómir súrý sapasyn jaqsartý men mobıldiligin arttyrý maqsatynda ishki áýe reısterine jeńildikter qarastyrýdy usyndy:

- І jáne ІІ toptaǵy múgedektigi bar adamdar úshin jeńildikter nemese arnaıy tarıf bılet qunynyń 50% mólsherinde bolsyn;

- Osy sanattaǵy adamdarǵa jylyna bir ret, bir baǵytqa ushyp barý jáne ushyp qaıtý tegin áýe qatynasymen qamtamasyz etilsin;

- Múgedektigi bar balalarǵa árqashan tegin reıster jasalsyn;

- Ushý barysynda súıemeldeýdi qajet etken jaǵdaıda, súıemeldeýshi adamdar úshin jeńildetilgen tarıf kózdelsin.