Múgedektigi bar adamǵa qyzmet kórsetken otbasy múshesi jalaqy alady

ASTANA. QazAqparat – Múgedektigi bar adamǵa qyzmet kórsetý isine olardyń otbasy múshelerin barynsha tartylady. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Kodekstiń úshinshi jańalyǵy – áleýmettik qyzmet kórsetý júıesin transfomatsııalaý. Mundaǵy negizgi maqsat - múgedektigi bar adamdarǵa kórsetiletin arnaýly áleýmettik qyzmetterdiń qoljetimdiligin ásirese aýyldyq okrýgterde arttyrý. Bul úshin mynadaı ózgeristerdi qarastyryp otyrmyz. Birinshiden - jan basyna shaqqandaǵy normatıv engizý. Onyń mólsheri qyzmetter úshin jeke normatıvter, al kompensatorlyq tehnıkalyq quraldar úshin shekteýli baǵalar túrinde zertteletin bolady. Bul ózgerister bir jaǵynan, keıbir qyzmet nemese taýar túrlerin aldaǵy ýaqytta monetızatsııalaýǵa alyp ákeledi. Ekinshi jaǵynan, arnaıy áleýmettik qyzmet kórsetýge jeke sektordy keńinen tartý arqyly salanyń ınfraqurylymyn aýyldyq jerlerge deıin jetkizýge múmkindik beredi», - dedi mınıstr.

Ol taǵy bir ózgeris retinde múgedektigi bar adamǵa qyzmet kórsetý isine olardyń otbasy múshelerin barynsha tartý ekendigin aıtty.

«Bul rette otbasy múshesi jeke kómekshi nemese áleýmettik qyzmetker retinde resimdeledi. Bul jumysqa eńbekaqy tólenedi jáne áleýmettik tólemder men zeınetaqy jarnalary aýdarylady. Osylaısha, otbasynyń eńbek jasyndaǵy jumyssyz músheleri qyzmetke ornalasady. Sóıtip, áleýmettik táýekel týyndaǵan jaǵdaıda áleýmettik qamsyzdandyrý sharalarymen tolyq qamtylady», - dedi Tamara Dúısenova.