Múgedektigi bar adamdarǵa jeke notarıýstar tegin qyzmet kórsetedi
Atalǵan zań jobasynyń birinshi oqylymy 27 sáýirde ótken bolatyn.
«Zań jobasy múgedektigi bar adamdardyń ómir súrý sapasyn jaqsartýǵa baǵyttalǵan jáne Qazaqstan Respýblıkasynyń zańnamasyna kemsitýshilik termınderdi joıý jáne «múgedek» degen uǵymdy «múgedektigi bar adamǵa», «múgedek bala» degen uǵymdy «múgedektigi bar balaǵa» aýystyrýdy kózdeıdi. Sonymen birge, múgedektigi bar adamdardyń densaýlyq saqtaý uıymdarynda birinshi kezekte qyzmet kórsetilý, tehnıkalyq jáne quqyqtyq sıpattaǵy áreketterdi jasaý kezinde jeke notarıýstardyń tegin qyzmetterin alý, aqparatqa qol jetkizý jáne kedergisiz orta qalyptastyrý quqyqtaryn qamtamasyz etý bóliginde birqatar ózgerister men tolyqtyrýlar qarastyrylǵan», - dedi Májilistiń Áleýmettik-mádenı damý komıtetiniń múshesi Larısa Pavlovets.
Sonymen qatar zań jobasynda múgedektigi bar balany sanatorıılik-kýrorttyq emdeýge alyp júretin zańdy ókilderdiń birine sanatorıılik-kýrorttyq uıymda bolý quny halyqty áleýmettik qorǵaý salasyndaǵy ýákiletti organ aıqyndaıtyn somanyń 70%-y mólsherinde óteledi.
Zań jobasymen jumys barysynda depýtattar múgedektikti, eńbekke qabilettilikten aıyrylý dárejesin belgileý jónindegi medıtsınalyq-áleýmettik saraptamadan syrttaı ótý múmkindigin berý, dárihanalary joq aýyldyq eldi mekenderdiń turǵyndary úshin dárilik zattar men medıtsınalyq buıymdardy densaýlyq saqtaý uıymdary arqyly ótkizý syndy túzetýler engizgen.
«Zań jobasynda óńirdiń áleýmettik-ekonomıkalyq damýyna jáne onyń ınfraqurylymyn damytýǵa jer qoınaýyn paıdalanýshylardyń jergilikti bıýdjetke aýdarylatyn qarajaty esebinen áleýmettik kásipkerlik sýbektilerin qoldaý, taksı tasymaldaýshylarynda ádettegi 10 avtomobılge múgedektigi bar adamdardy tasymaldaý jónindegi bir mamandandyrylǵan avtokóliktiń bolýy, múgedektigi bar adamdar men júrip-turýy shekteýli basqa da toptardy tasymaldaýǵa beıimdelgen avtobýstardy basymdyqpen satyp alýy syndy normalardy 2023 jylǵy 1 qańtardan bastap qoldanysqa engizý jóninde túzetý engizildi. Jumys tobynyń 8 otyrysy, jumys keńesi, zań jobasynyń tanystyrylymy, Komıtettiń 2 keńeıtilgen otyrysy ótkizildi. Aıtylǵandardy eskere otyryp, komıtet «QR keıbir zańnamalyq aktilerine múgedektigi bar adamdardyń ómir súrý sapasyn jaqsartý máseleleri boıynsha ózgerister men tolyqtyrýlar engizý týraly» Zań jobasyn ekinshi oqylymda maquldap, ony Parlament Senatynyń qaraýyna jiberýge bolady dep esepteıdi», - dedi L. Pavlovets.