Múgedektigi bar adamdar úshin onlaın qyzmet alýda kemshin tus kóp - Senat depýtaty
Bul otyrys Senat depýtaty Lázzat Qaltaevanyń bastamasymen ótkizildi. Depýtat azamattardyń, onyń ishinde kórý qabileti buzylǵandardyń ótinishteri boıynsha memlekettik organdar saıttarynyń, sondaı-aq mobıldi qosymshalar men ómirdiń túrli salalaryndaǵy basqa da qyzmetterdiń qoljetimsizdigi máselesin kóterdi.
«Buǵan deıin múgedektigi bar adamdarǵa tsıfrlyq tehnologııalar men aqparattyń qoljetimdiligi taqyryby týraly depýtattyq saýal joldaǵan edim. Berilgen jaýapta ýákiletti organdar bul salada jumystar júrgizilip jatqanyn aıtty», - dedi senator Lázzat Qaltaeva.
Lázzat Qaltaeva óziniń depýtattyq saýalynda memlekettik organdardyń saıttary, birqatar elektrondyq qyzmetter: jedelhat-bottar, baǵdarlamalyq jáne mobıldi qosymshalarǵa múgedektigi bar adamdardyń qol jetkizýi múmkin emes ekenin kórsetken. Senatordyń aıtýynsha, osyǵan baılanysty múgedek adamdardy aqparatpen, tsıfrlyq resýrstarmen jáne servıstermen qamtamasyz etýdiń qoldanystaǵy standarttaryn qaıta qaraý qajettigi týyndap otyr.
Ýákiletti memlekettik organdardyń ókilderi júrgizilip jatqan jumystar týraly aıtyp, zańnamalar men ulttyq standarttarǵa ózgerister engizý máselesine toqtaldy.
Otyrysqa Eńbek jáne halyqty áleýmettik qorǵaý, sondaı-aq Tsıfrlyq damý, ınnovatsııalar jáne aeroǵarysh ónerkásibi, Saýda jáne ıntegratsııa, Aqparat jáne qoǵamdyq damý mınıstrlikteriniń ókilderi qatysty.