Múgedektigi bar adamdar partııalyq tizimderge mindetti túrde engiziledi – Qanat Mýsın

NUR-SULTAN. QazAqparat – Parlament Májilisi «Saıası partııalar týraly» Qazaqstan Respýblıkasynyń Zańyna ózgeris engizý týraly» zań jobasyn maquldady, dep habarlaıdy QazAqparat tilshisi.

Zań jobasyn qabyldaýdyń maqsaty - kvotalanatyn sanattardy oǵan múgedektigi bar adamdardy engize otyryp keńeıtý. Áıelderdi, jastardy jáne múgedektigi bar adamdardy eldegi saıası máselelerge belsendi tartý norma shyǵarý protsesine qatysý arqyly eldiń neǵurlym osal jáne problemalyq máselelerin sheshýde osy sanattardyń pikirin eskerýge múmkindik beredi.

«Usynylyp otyrǵan zań jobasy áıelder men jastarmen qatar, sondaı-aq múgedektigi bar adamdardy partııalyq tizimderge mindetti túrde engizýdi kózdeıdi. Bul Memleket basshysynyń kvotalanatyn sanattardy keńeıtý jónindegi tapsyrmasyn iske asyrýǵa baılanysty. Oǵan sáıkes «Saılaý týraly» Konstıtýtsııalyq zańnan basqa, «Saıası partııalar týraly» Zańǵa tıisti túzetýler engizý qajet», - dedi QR Ádilet mınıstri Qanat Mýsın.

Májilistiń Zańnama jáne sot-quqyqtyq reforma komıtetiniń málimetinshe, budan basqa, depýtattyq mandattardy bólý kezinde áıelderdi, jastardy jáne múgedektigi bar adamdardy mindetti túrde qosý áleýmettik artyqshylyqtarǵa ıe. Sonymen, saıası laýazymnyń osy sanattarymen aınalysý áleýmettik-saıası, quqyqtyq máselelerdi sheshýde olardyń pikirlerin eskerýge múmkindik beredi. Ómirdiń barlyq salalaryndaǵy belsendilikti jáne qoǵamnyń odan ári áleýmettik-ekonomıkalyq damýyn arttyrady.

Budan buryn habarlanǵandaı, Májilis «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Qazaqstan Respýblıkasy Konstıtýtsııalyq zań jobasyn maquldady.