Múgedektigi bar adam áli de eńbek naryǵynda básekege qabiletti emes - Zahıra Begalıeva

ASTANA. QazAqparat – «ITeachMe» qoǵamdyq qorynyń dırektory Zahıra Begalıeva eńbek naryǵynda múdegektigi bar tulǵalardyń básekelestikke qabilettiligin arttyrýǵa baǵyttalǵan jumystar jaıynda aıtty, dep habarlaıdy QazAqparat tilshisi.

«Búginde Qazaqstanda múgedektigi bar 711,8 myńǵa jýyq adam turady. Onyń ishinde 420 myń adam eńbekke qabiletti jasta. Bul – jumys kúshi bola alatyn adamdardyń úlken pýly. Biraq, shynaıy ómirde múgedektigi bar adam áli de kásibı eńbek naryǵynda básekege qabiletti emes», - dedi Zahıra Begalıeva Ortalyq kommýnıkatsııalar qyzmetindegi baspasóz máslıhatynda.

Spıkerdiń aıtýynsha, ITeachMe qory birneshe jyl boıy jumys isteıdi jáne jastardyń, onyń ishinde múgedektigi bar jandardyń kásibı daǵdylary men bilimin arttyrý, olardy keıinnen jumysqa ornalasý baǵdarlamalaryn júzege asyrady.

«Jobalardy iske asyrý barysynda jastardyń jumyspen qamtylýynyń tómendigine áser etetin birqatar faktorǵa tap boldyq. Sebepterdiń biri - ýnıversıtetterde alynǵan bilim árdaıym áleýetti jumys berýshi úshin is júzinde ári qajettiligine qoldanyla bermeıdi. Oqý ornyn bitirgennen keıin túlekti birden jumysqa qabyldaý úshin dıplomnyń bolýy jetkiliksiz. Qosymsha daǵdylarǵa meńgerip, trendte bolý kerek. Al búginde búkil álemde jańa tehnologııalar men tsıfrlyq daǵdylar trend sanalady», - dedi ol.

Onyń atap ótýinshe, múgedektigi bar adamdardy jumysqa ornalastyrýda qalalardyń, aýdan ortalyqtarynyń kólik jáne sáýlet ınfraqurylymynyń nashar damýy, al aýyldarda jalpy munda jaǵdaıdyń nasharlyǵy ahýaldy kúrdelendirip jiberedi.

«Problemalardy júıeli sheshýdiń biri – beıresmı bilim berý. Ómir boıy oqytý tujyrymdamasy tek tar beıindi ǵana emes, sonymen qatar óziniń eńbek quqyqtaryn júzege asyrýǵa múmkindik beredi. Barlyq jastardyń, sonyń ishinde múgedektigi bar adamdardyń zamanaýı mamandyq alý jáne ońaı jumys tabý múmkindikterin teńestirýge kómektesetin negizgi qural – tsıfrlandyrý. ITeachMe qory áleýmettik ınvestorlarmen, bas seriktes – Shevron kompanııasymen seriktestikte 2019 jyldan bastap, múgedek jastar men áleýetti jumys berýshilerdiń suranysy boıynsha bilim berý baǵdarlamalaryn júzege asyrýda. Oqytýdyń basty ereksheligi – oqý protsesinde tyńdaýshylar ózderiniń digital daǵdylaryn monetızatsııalaıdy», - dep túıindedi sózin qor basshysy.