Múgedekti jumysqa alǵan kásiporynǵa toqsanyna 42,5 myń teńge ótemaqy jarnasy engizilmek

NUR-SULTAN. QazAqparat – Qazaqstanda múgedektigi bar adamdy jumysqa alǵan kásiporynǵa toqsanyna 42,5 myń teńge ótemaqy jarnasy engizý josparlanyp otyr. Bul týraly QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

Senatta ótken áleýmettik kásipkerlermen kezdesý barysynda Birjan Nurymbetov Eńbek mınıstrligi múgedektigi bar tulǵalarǵa arnalǵan zańnamaǵa túzetýler toptamasyn ázirlegenin aıtty.

«Olardyń biri osy sanattaǵy azamattarǵa arnalǵan jumys oryndary kvotasyn iske asyrýdy yntalandyrýǵa baǵyttalǵan. Osylaısha, balamaly nusqa – toqsanyna 1 eń tómengi jalaqy mólsherinde nemese 42,5 myń teńge ótemaqy jarnasyn engizý josparlanýda. Bul shara múgedektigi bar tulǵalardy áleýmettik jaýapty kásiporyndar arasynda jumysqa ornalastyrýǵa baǵyttalady», - dedi ol.

Sondaı-aq mınıstrdiń aıtýynsha, múgedektigi bar adamdardy jumysqa ornalastyratyn jeke HR-agenttikterdiń qyzmetine tólenetin aqyny ulǵaıtý josparlanyp otyr.

Eske sala ketsek, atalǵan kezdesý barysynda halyqtyń áleýmettik osal toptaryn kásipkerlik qyzmetke tartý úshin 5 baǵyt aıasynda júıeli jumys júrgizilip jatqany aıtylǵan bolatyn.

Al kezdesýge tóraǵalyq etken Senat tóraǵasy Máýlen Áshimbaev depýtattar áleýmettik kásipkerlikti qoldaý týraly zań jobasyn ázirleıtindigin habarlaǵan edi.