Aqtóbe oblysynda múmkindigi shekteýli jandardy qoldaýǵa 6 mlrd teńgeden astam qarjy bólingen
Konferentsııa taqyryby - «Inklıýzııaǵa baǵyttalǵan, tek qurylymdyq teńsizdikterge ǵana emes, sondaı-aq múgedek adamdardyń qoǵamǵa áleýmettik ıntegratsııasyn ilgeriletýge yqpal etetin mádenı, ıdeologııalyq, minez-qulyq aspektilerine nazar aýdaratyn áleýmettik baǵdarlamalardyń tıimdiligin, belsendendirilýin jáne qoljetimdiligin arttyrý».
Óńir basshysy óz sózinde memleket erekshe qajettilikteri bar adamdardyń ómir súrý sapasyn jaqsartý jáne olardyń qoǵamǵa áleýmettik yqpaldasýy úshin júıeli sharalar qabyldap jatqanyn tilge tıek etti.
«Búginde Aqtóbe oblysynda múgedektigi bar 30 myńnan astam adam tursa, onyń 5 myńnan astamy – balalar. Mundaı erekshe jandardy áleýmettik qoldaý maqsatynda respýblıkalyq jáne jergilikti bıýdjetten 6,0 mlrd. teńgeden astam qarjy bólingen. Qarajat múgedektigi bar adamdardyń ómir súrý sapasyn jaqsartý jónindegi ulttyq is-qımyl josparyn jáne múgedekterdiń úkimettik emes uıymdaryna memlekettik áleýmettik tapsyrysty iske asyrýǵa, ıaǵnı jol belgilerin, baǵdarshamdardy ornatý, ınvataksı qyzmetterin usyný, jańalyqtar habarlaryn sýrdoaýdarýdy qamtamasyz etýge baǵyttaldy. Sonymen qatar, áleýmettik ınfraqurylymdar qoljetimdi bolý úshin oblysta 874 nysan erekshe jandarǵa dep beıimdeldi», - dedi Ashat Shaharov.
Oblys ákimi erekshe jandarǵa qoldaý kórsetý jumystary áli de jalǵasatynyn aıtty, bıznes-qurylymdar, metsenattar, qoǵamdyq uıymdardy bul sharalarǵa úles qosýǵa shaqyrdy.
Jıynda Eńbek jáne halyqty áleýmettik qorǵaý mınıstrligi, azamattyq qoǵam men úkimettik emes uıym ókilderi sóz alyp, atqarǵan jumystary jáne aldaǵy josparlarymen bólisti. Múgedektigi bar adamdardyń ózekti máseleleri sheshimin tabatynyna senim bildirdi.